Navoiy kon-metallurgiya kombinati ishchi-xodimlarini ijtimoiy himoya qilish, ular uchun munosib ish va yashash sharoitlarini yaratish kombinat maʼmuriyati va kasaba uyushmasi Kengashining doimiy eʼtibori markazida.

Kombinat jamoasi O‘zbekiston Respublikasi davlat mustaqilligining 35 yilligi bayramini ko‘tarinki ruhda, munosib kutib olmoqda. Eng ulug‘, eng aziz bayram arafasida “Zarmitan” konida ishchi-xodimlarga zaruriy shart-sharoitlar yaratish maqsadida 400 o‘rinli maishiy bino foydalanishga topshirildi.

- Yangi maishiy binoning zamonaviy uskunalar bilan jihozlangani “Zarmitan” koni ishchi-xodimlari uchun qulayliklarni yaratdi. Zarafshon qurilish boshqarmasi quruvchilari, Janubiy kon boshqarmasi mutaxassislari tomonidan barpo etilgan ushbu binoda yuvinish, kiyinish, kiyimlarni saqlash, quritish xonalari va tibbiyot punkti mavjud. Maishiy binodagi tibbiyot punktiga o‘rnatilgan zamonaviy uskunalar inson omilisiz tibbiy ko‘rikdan o‘tayotgan ishchi-xodimlarning salomatligini baholash imkoniga ega, - deydi Janubiy kon boshqarmasi kapital qurilish bo‘limi boshlig‘i A.Safarov.

Maishiy binoni foydalanishga topshirish marosimida kombinat rahbariyati, Samarqand viloyati, Qo‘shrabot tumani hokimliklari, Janubiy kon boshqarmasi ishchi-xodimlari, mehnat faxriylari ishtirok etishdi. Tadbirda “NKMK” AJ Boshqaruvi raisi – Bosh direktori Quvondiq Sanaqulov ishtirok etib, tadbir ishtirokchilarini mamlakatimiz mustaqilligining 35 yilligi hamda topshirilgan yangi bino bilan muborakbod etdi.

Tantanali tadbirda bir guruh soha ilg‘orlari, mehnat faxriylari, quruvchilar va hamkorlar kombinat maʼmuriyati va kasaba uyushmasi Kengashi tomonidan ko‘krak nishonlari, faxriy yorliqlar, tashakkurnoma va qimmatbaho sovg‘alar bilan rag‘batlantirildi.

“NKMK” AJ Matbuot xizmati