Oldin xabar berganimizdek, Toshkent shahrida 22-23-oktabr kunlari o‘tkazilgan 18-Xalqaro “Tog‘-kon ishi, metallurgiya va metallsozlik – MiningMetals Uzbekistan 2024” ko‘rgazmasi doirasida O‘zbekiston Respublikasi Tog‘-kon sanoati va geologiya vazirligi ko‘magida 6-O‘zbekiston xalqaro kon-metallurgiya forumi (UIMF 2024) bo‘lib o‘tdi.

“Navoiy kon-metallurgiya kombinati” AJ har yili o‘tkaziladigan mazkur forumning bosh hamkori sifatida ishtirok etdi. Joriy yilda tadbir “Konchilik sohasi va sanoat tarmoqlarida mintaqaviy va xalqaro hamkorlik: muhim qadamlar va taraqqiyot yo‘nalishlari” mavzusida tashkil etildi. Forumda dunyoning 15 ta mamlakatidan 50 nafardan ortiq maʼruzachi va 250 nafardan ziyod vakillar qatnashdi.

Forum doirasida “NKMK” AJ tomonidan “Tog‘-kon sanoatida ayollar: imkoniyatlarni yaratish” mavzusida maxsus panel sessiyasi o‘tkazildi. Ushbu sessiyada sohadagi global tendensiyalar, xotin-qizlarning tog‘-kon sanoatidagi faolligi ortib borayotgani, ularning salohiyati va yetakchilik qobiliyatlari to‘g‘risida so‘z yuritildi. Mazkur sessiyada NKMK, OKMK, O‘zmetkombinat, “Uzcopper” kabi O‘zbekistonning yetakchi sanoat korxonalari hamda “IWIM”, “DMT Group” xalqaro kompaniyalari vakillari qatnashishdi. Unda xotin-qizlarning imkoniyatlarini kengaytirish, ularni o‘qitishga qaratilgan turli dastur va tashabbuslar muhokama qilindi.

2024-yilning avgust oyida “NKMK” AJ “International Women in Mining” (“IwiM” – tog‘-kon sanoatidagi Xalqaro ayollar tashkiloti) bilan hamkorlik o‘rnatib, ushbu tashkilotga O‘zbekistondan qo‘shilgan birinchi hamkor kompaniya bo‘ldi.

Tadbirda “NKMK” AJ ayollar Kengashi raisi Sabohat Nazarova taʼkidlaganidek:

“Gender tenglik korxona faoliyatida muhim rol o‘ynaydi. Kombinat tomonidan “Gender tenglik va ayollar huquqlarini rag‘batlantirish tamoyillari” amalga oshirilmoqda. Biz turli loyiha va tashabbuslar orqali korxonada faoliyat olib borayotgan xotin-qizlarni o‘qitish va malakasini oshirish, ularning sohadagi bilim va ko‘nikmalarini rivojlantirishga intilamiz.”

“NKMK” AJ tashkiliy rivojlanish bo‘limi boshlig‘i Raʼno Qosimova:

“Kombinat barqaror rivojlanishning ekologik, ijtimoiy va boshqaruv (ESG) maqsadlarga qaratilgan uzoq muddatli strategiyasi doirasida xotin-qizlarning huquq va imkoniyatlarini kengaytirishga eʼtibor qaratmoqda. “IwiM” tashkiloti bilan hamkorligimiz Qirg‘iziston va Qozog‘iston kompaniyalari bilan aloqalarni o‘rnatish imkonini berdi. Ushbu mintaqaviy hamkorlik korxonaning “Tog‘-kon sanoatida ayollar” harakatidagi rolini kuchaytirib, gender tengligiga erishish va Markaziy Osiyoda tog‘-kon sanoatida ayollar uchun yetakchilik imkoniyatlarini kengaytirish yo‘lini ochib beradi.”

“NKMK” AJ Matbuot xizmati.