Navoiy kon-metallurgiya kombinatining oltin tarkibli maʼdanni qayta ishlash va mahsulot ishlab chiqarish quvvati jihatidan eng yirik korxonasi – 2-gidrometallurgiya zavodida 2026-yilda ham investitsion loyihalarni amalga oshirish davom etmoqda.

2025-yilda zavodning sorbsiya va regeneratsiya sexlarida qo‘shimcha 30 ta sorbsion uskuna, quyultirish sexida 2 ta quyultirgich qurish, 16-nasos stansiyasini rekonstruksiya qilish, maydalash sexining ikkinchi binosini kengaytirish va sexning ikkinchi navbati loyihasi asosida 33-tegirmon blokini montaj qilish ishlari olib borildi. O‘tgan yil yakuni bo‘yicha zavodda 55,6 mln. tonnadan ortiq maʼdan qayta ishlandi.

Bugungi kunda maydalash sexining ikkinchi binosini kengaytirish va 33-tegirmon blokini montaj qilish ishlari davom etmoqda. Markaziy kon boshqarmasining Kapital qurilish bo‘limi va Zarafshon qurilish boshqarmasi tomonidan olib borilayotgan ishlarni joriy yilda to‘liq yakunlash rejalashtirilgan. Kelgusida ushbu tegirmon blokini ishga tushirish zavodda maʼdan qayta ishlash va mahsulot ishlab chiqarish hajmini oshirishga xizmat qiladi. Zavodda qurilish-montaj ishlari uchun kerakli asbob-uskunalar va ehtiyot qismlar mahalliylashtirilib, Navoiy mashinasozlik zavodi hamda Zarafshon taʼmirlash-mexanik zavodida ishlab chiqarilmoqda.

2-gidrometallurgiya zavodida amalga oshirilayotgan loyihalar va texnologik modernizatsiya Navoiy kon-metallurgiya kombinatida qimmatbaho metallar ishlab chiqarish hajmini oshirish uchun muhim ahamiyat kasb etadi.

“NKMK” AJ Matbuot xizmati