NKMK boshlang‘ich tashkilot yetakchilari so‘lim va go‘zal Zomin tog‘lari bag‘rida joylashgan “NKMK” sanatoriysiga yetib kelishdi. Maʼlumki, bu manzil o‘zining purviqor tog‘lari, betakror tabiati va shifobaxsh xususiyatlari, dam olish uchun zamonaviy sharoitlari bilan nafaqat yurtdoshlarimizni, balki dunyo sayyohlarini o‘ziga rom etib kelmoqda.

Kombinat tomonidan barpo etilgan “NKMK” sanatoriysi go‘zal tabiat bag‘rida joylashgan. Bu maskan korxona ishchi-xodimlari va ularning oila aʼzolariga xizmat ko‘rsatib kelmoqda. Unda dam oluvchilar uchun barcha shart-sharoitlar yaratilgan. Bunday imkoniyatlar NKMK yoshlariga ham nasib etdi.

- Zominga kelish bilan uning betakror tabiati va toza havosi har qanday inson ruhiyatiga tetiklik bag‘ishlaydi. Bizga mana shunday imkoniyatlarni yaratib bergan kombinat rahbariyati va tashabbuskorlarga rahmat! Barchamiz dasturdan joy olgan mashg‘ulotlarda faol ishtirok etdik, - deydi Markaziy kon boshqarmasi yoshlar yetakchisi Saodat Boboyorova.

Zomin tumanida joylashgan “NKMK” sihatgohida 31-yanvar – 3-fevral kunlari kombinat boshlang‘ich tashkilot yetakchilari uchun liderlik qobiliyatini rivojlantirish, yoshlar bilan ishlash ko‘nikmalarini shakllantirishga qaratilgan o‘quv-amaliy seminar o‘tkazildi. Tadbir dasturidan qiziqarli maʼnaviy-maʼrifiy va sport tadbirlari ham keng o‘rin olgan.

Seminarning ikkinchi kunida kombinat bo‘linmalarida ishlaydigan yoshlar yetakchilari uchun “Zakovat“ intellektual o‘yini o‘tkazildi. Shuningdek, “NKMK jamg‘armasi” DM bosh direktorining ma‘naviy-ma‘rifiy ishlar va davlat tili masalalari bo‘yicha maslahatchisi J.Shuhratov tomonidan bugungi dunyoning mafkuraviy manzarasi, yoshlar orasida keng kuzatilayotgan salbiy holatlar haqida taqdimot va ma'ruza qilindi.

O‘quv-amaliy seminar yakunida 2024-yil mobaynida qilingan ishlar sarhisob qilinib, yilning eng yaxshi yoshlar yetakchilari mukofotlandi. Jumladan, 3-o‘rin Janubiy kon boshqarmasi markaziy apparat yoshlar yetakchisi E.Norchayev, 2-o‘rin Markaziy kon boshqarmasi Temir yo‘l boshqarmasi yoshlar yetakchisi F.Ashurov, 1-o‘rin Shimoliy kon boshqarmasi 1-avtokorxonasi yoshlar yetakchisi X.Bo‘riyevlarga nasib etdi.

Shuningdek, 2025-yilda NKMK tizimida yoshlarga oid davlat siyosatini amalga oshirish chora-tadbirlari dasturi yuzasidan aniq vazifalar belgilab olindi.

“NKMK” AJ Matbuot xizmati.