Bugungi kunda inson salomatligi, kelajak avlod vakillari sog‘lom ruhda voyaga yetkazishda sportning o‘rni beqiyos. Navoiy kon-metallurgiya kombinati nafaqat ishlab chiqarishda, balki zamonaviy sport majmualari barpo etish, mamlakatimiz sport sohasini qo‘llab-quvvatlash borasida har tomonlama o‘rnak bo‘lib kelayotgani ayni haqiqat.

O‘tgan yillar mobaynida kombinat tomonidan Navoiy, Zarafshon, Nurobod, Uchquduq shaharlari, Zarkent va Zafarobod qo‘rg‘onlari, Marjonbuloq shaharchasida zamonaviy sport majmualari, stadionlar, mini-futbol maydonlari barpo etilgani buning isbotidir.

Quvonarli jihati, yaratib bergan bunday keng sharoitlar natijasida konchi-metallurglar, ular oila aʼzolari muntazam sport bilan shug‘ullanib, tarbiyalanuvchilari orasidan o‘tgan yillarda O‘zbekiston, Osiyo, jahon chempionlari va sovrindorlari, xalqaro musobaqalar g‘oliblari yetishib chiqqanini mamnuniyat bilan taʼkidlash joiz. Bundan tashqari, hozirgi kunda ham ularda minglab yoshlar, kombinat ishchi-xodimlari, hudud aholisi o‘zlari tanlagan sport turlari bilan muntazam shug‘ullanib kelmoqda va bundan ular mamnun.

photo_2022-12-02_18-41-51

Yana shuni alohida taʼkidlash kerakki, NKMK qator yillardan buyon “Qizilqum” professional futbol klubi, O‘zbekiston suzish federatsiyasi bosh homiysi sifatida bu ikki jamoani har tomonlama qo‘llab-quvvatlab kelmoqda. Hozir ham yurtdoshlarimiz manfaati yo‘lida homiylik hisobidan yangi sport majmualarini barpo etish, shuningdek, ko‘plab xalqaro musobaqalarga mezbonlik qilish, majmualarni sport jihozlari bilan taʼminlash, sportchilarning nufuzli musobaqalarda ishtirokini qo‘llab-quvvatlashda faol qatnashib kelmoqda. Birgina, joriy yilda Navoiy shahrida Gandbol zali foydalanishga topshirilgani, ayni kunlarda “To‘dako‘l” dam olish bazasida Xalqaro shaxmat maktabini barpo etish bo‘yicha ishlar olib borilayotgani bunga yaqqol misoldir.

photo_2022-12-02_18-42-57

Kombinat bu bilan to‘xtab qolgani yo‘q. Jumladan, bu boradagi xayrli ishlarni davom ettirib, 2024-yil Parijda bo‘lib o‘tadigan XXXIII yozgi olimpiya va XVII yozgi Paralimpiya o‘yinlariga litsenziyani qo‘lga kiritish uchun tayyorgarlik ko‘rayotgan O‘zbekiston sportchilariga zarur shart-sharoitlar yaratish hamda ularni qo‘llab-quvvatlashda homiylik yordamini ko‘rsatib kelmoqda. Zero, yurtimiz sportchilarining har bir g‘alabasi, uning dovrug‘ini yana-da dunyoga tanitadi.

“NKMK” AJ Matbuot xizmati.