O‘zbekiston Respublikasi konchilik va metallurgiya sanoati xodimlari kuni arafasida Navoiy shahridagi “NKMK tarixi” muzeyida Navoiy kon-metallurgiya kombinati ishchi-xodimlari o‘rtasida o‘tkazilgan “Eng yaxshi ratsionalizatorlik taklifi” tanlovi g‘oliblarini taqdirlash tadbiri o‘tkazildi.

Tadbirda “NKMK” AJ Ishlab chiqarish bo‘yicha direktor S.Isuns, NKMK xodimlari kasaba uyushmasi Kengashi raisi I.Rahmatovlar ishtirok etib, tanlov g‘oliblarini tabrikladi va kombinatda ishlab chiqarish jarayoniga ilmiy ishlanmalar, innovatsion g‘oya va ratsionalizatorlik takliflarini joriy etishga katta eʼtibor berilayotganini alohida taʼkidladi.

So‘nggi yillarda korxona mutaxassislari tomonidan 39 ta yaratilgan ixtiroga respublika va xorijiy davlatlarning patentlari olindi. 2018-2025 yillarda 1 432 ta ratsionalizatorlik taklifidan kombinat 586,9 mlrd. so‘m iqtisodiy samaradorlikka erishdi.

“Eng yaxshi ratsionalizatorlik taklifi” tanlovi komissiyasiga 281 nafar ishtirokchidan 257 ta ratsionalizatorlik taklifi kelib tushdi. Tanlov komissiyasi tomonidan ular orasidan geologiya, konchilik ishi, oltin ajratib olish texnologiyasi, mexanika, energetika, transport, ishlab chiqarishni avtomatlashtirish, axborot-kommunikatsiya texnologiyalari, xavfsizlik texnikasi, atrof-muhitni muhofaza qilish kabi yo‘nalishlar bo‘yicha eng munosib topilgan g‘oliblar aniqlandi.

- Ushbu tanlovda g‘oliblar safidan joy olganim men uchun katta sharaf va unutilmas voqea bo‘ldi. Eng muhimi, kombinatimizda yoshlar va izlanuvchan mutaxassislarning g‘oyalari doimiy qo‘llab-quvvatlanayotgani bizga ishonch va motivatsiya bermoqda. Hamkasbim Suhrob Rahimov bilan hammualliflikda taqdim etgan ratsionalizatorlik taklifimiz yer osti kon ishlarida mehnat qilayotgan ishchilar xavfsizligini taʼminlashga qaratilgan bo‘lib, konchilik ishi yo‘nalishida birinchi o‘ringa loyiq topildi. Bu taklif orqali inson hayoti va xavfsizligini taʼminlashga oz bo‘lsada hissa qo‘sha olganimizdan xursandman, - Janubiy kon boshqarmasi Konchilik bo‘limi yetakchi muhandisi Suhrobjon Rahmonov.

Yakuniy natijalarga ko‘ra, o‘nta yo‘nalish bo‘yicha 24 nafar ishtirokchi faxrli 1-o‘ringa, 45 nafari 2 va 3-o‘rinlarga loyiq topildi.

Tanlov g‘oliblari diplom va pul mukofotlari bilan taqdirlandi.

“NKMK” AJ Matbuot xizmati