Bugun Navoiy shahridagi “Farhod” madaniyat saroyida Navoiy kon-metallurgiya kombinati ishchi-xodimlari uchun O‘zbekiston Respublikasi konchilik va metallurgiya sanoati xodimlari kuniga bag‘ishlangan bayram tantanasi o‘tkazildi.

Tadbir boshlanishidan oldin kasb bayrami munosabati bilan kombinatda mehnat faoliyatini olib borayotgan turli kasb egalarining suratlari aks etgan “Qizilqumning matonatli insonlari” nomli ko‘rgazma hamda “Farhod” madaniyat saroyiga qarashli Bolalar ijodiyoti markazi va to‘garaklarning ko‘rgazmasi namoyish etildi.

Tadbirda “NKMK” AJ Boshqaruvi raisi – Bosh direktori Q.Sanaqulovning kombinat jamoasi, soha xodimlari va mehnat faxriylariga yo‘llangan bayram tabrigini kombinat bosh muhandisi A.Ravshanov o‘qib eshittirdi. Tabrikda soha vakillarining amalga oshirgan ishlari, yutuqlarini eʼtirof etildi.

Kasb bayrami munosabati bilan Navoiy kon-metallurgiya kombinatining bir guruh ishchi-xodimlari ko‘p yillik fidokorona mehnati, sohani rivojlantirishga qo‘shayotgan yuksak hissasi uchun “NKMK faxriysi” unvoni, “Konchilik shuhrati” ko‘krak nishoni bilan taqdirlandi.

Shuningdek, bayram tadbirida kombinat ishchi-xodimlari o‘rtasida o‘tkazilgan “Eng yaxshi ratsionalizatorlik taklifi” tanlovida geologiya, konchilik ishi, oltin ajratib olish texnologiyasi, mexanika, energetika, transport, ishlab chiqarishni avtomatlashtirish, axborot-kommunikatsiya texnologiyalari, xavfsizlik texnikasi, atrof-muhitni muhofaza qilish kabi yo‘nalishlar bo‘yicha 1-o‘rinlarni egallagan go‘liblar taqdirlandi.

Shu bilan birga Janubiy kon boshqarmasi “G‘ujumsoy” koni yetakchi muhandisi Gulshod Qurbonovaga 15-may – Xalqaro oila kuni munosabati bilan “Ibratli oila” ko‘krak nishoni topshirildi.

Tadbirda Navoiy kon-metallurgiya kombinati maʼmuriyati va kasaba uyushmasi Kengashi tashabbusi bilan tadbir ishtirokchilariga mazmunli madaniy hordiq bag‘ishlash uchun Muqimiy nomidagi O‘zbekiston davlat akademik musiqali teatri ijodkorlari hamda “Farhod” madaniyat saroyi ijodiy jamoalari va xonandalarining konsert dasturi namoyish etildi.

“NKMK” AJ Matbuot xizmati