2-gidrometallurgiya zavodi Navoiy kon-metallurgiya kombinatining oltin tarkibli maʼdan qayta ishlash va mahsulot ishlab chiqarish quvvati jihatidan eng yirik korxonasi hisoblanadi. Zamonaviy texnologiyalarga asoslangan va tajribali mutaxassislarni birlashtirgan korxona jamoasining saʼy-harakatlari bilan ish ko‘lami yildan-yilga oshib bormoqda.

So‘nggi yillarda zavodda amalga oshirilayotgan modernizatsiya va texnik yangilanish ishlari natijasida maʼdan qayta ishlash quvvatlarini kengaytirish va qimmatbaho metallar ishlab chiqarish hajmini oshirish bo‘yicha keng ko‘lamli ishlar olib borilmoqda. O‘tgan vaqt mobaynida zavodning 2-navbati hamda maydalash sexida qo‘shimcha 33, 34 va 35-tegirmon bloklarining ishga tushirilishi tegirmonlar sonini 82 taga yetkazib, korxonaning yillik maʼdan qayta ishlash quvvatini qariyb 56 million tonnaga yetkazish imkonini berdi. Ayni paytda korxonada yangi tegirmonlar ishga tushirilishi evaziga bir sutkada 163 ming tonnadan ortiq maʼdan qayta ishlanmoqda. Ushbu tegirmon bloklarida texnologik jarayonlarni to‘liq nazorat qilish imkonini beruvchi avtomatlashtirilgan boshqaruv tizimlari o‘rnatilgan. Buning evaziga texnologik jarayonlarning barqaror ishlashi taʼminlamoqda.

Zavod maydalash sexini kengaytirish bilan birga sorbsiya va quyultirish sexlari quvvatlarini oshirish, asbob-uskunalarni modernizatsiyalash ishlari amalga oshirildi. Xususan, sorbsiya sexida qo‘shimcha 30 ta sorbsion uskuna barpo etildi hamda quyultirish sexida ikkita quyultirgich qurildi hamda 16-nasos stansiyasi rekonstruksiya qilindi. Zavodda olib borilgan qurilish-montaj ishlari uchun kerakli asbob-uskunalar va ehtiyot qismlar mahalliylashtirilib, Navoiy mashinasozlik zavodi hamda Zarafshon taʼmirlash-mexanik zavodida ishlab chiqarildi.

Zavodda ishchi-xodimlarning mehnat sharoitlarini yaxshilash, kasbiy malakasini oshirishga alohida eʼtibor qaratilmoqda. Mutaxassislar uchun o‘quv kurslari va malaka oshirish dasturlari tashkil etilib, ularning ko‘nikmalari muntazam ravishda oshirib borilmoqda. Muhandis-texnik xodimlarning ishlab chiqarish jarayonlarini optimallashtirishga qaratilgan ratsionalizatorlik takliflari ishlab chiqarishga joriy qilinmoqda. Bugungi kunda zavodda 3,5 ming nafardan ortiq ishchi-xizmatchilar, muhandis-texnik xodimlar faoliyat olib borishmoqda.

Keyingi yillarda 2-gidrometallurgiya zavodida amalga oshirilgan loyihalar va texnologik modernizatsiya Navoiy kon-metallurgiya kombinatida qimmatbaho metallar ishlab chiqarish hajmini oshirish uchun muhim ahamiyat kasb etadi.

“NKMK” AJ Matbuot xizmati