Bugun “NKMK” AJ boshqarmasida “Navoiy kon-metallurgiya kombinati” AJda 2025-yilda Jamoa shartnomasi majburiyatlari bajarilishi, 2025-2027-yillarga mo‘ljallangan Jamoa shartnomasiga qo‘shimcha va o‘zgartirishlar kiritishga bag‘ishlangan konferensiya o‘tkazildi.

Konferensiyada “NKMK” AJ Boshqaruvi raisi – Bosh direktori Q.Sanaqulov hamda NKMK xodimlari kasaba uyushmasi kengashi raisi I.Raxmatovlarning kun tartibidagi masala yuzasidan maʼruzalari tinglandi. Maʼruzachilar o‘z chiqishlarida 2025-yilda ishlab chiqarish rejalari bajarilishi, ishchi-xodimlarni ijtimoiy himoya qilish, rag‘batlantirish, munosib ish sharoitlari yaratilishi bo‘yicha fikr-mulohazalarini bildirib o‘tishdi.

Shuningdek, kombinatda 2025-yilda mehnat muhofazasi bo‘yicha bitimning bajarilishi va 2026-yil uchun mehnat muhofazasi bo‘yicha bitimni qabul qilish bo‘yicha Mehnat muhofazasi va xavfsizlik texnikasi bosh boshqarmasi boshlig‘i A.Tursunov, kombinatda Jamoa shartnomasi majburiyatlarini 2025-yilda bajarilishini tekshirish va kombinat ichki mehnat tartib qoidalariga o‘zgartirish va qo‘shimchalar kiritish yuzasidan bosh direktorning moliya, transformatsiya va xususiylashtirish bo‘yicha birinchi o‘rinbosari J.Xasanovning hisobotlari eshitildi.

Konferensiya kun tartibi muhokamasida delegatlar faol ishtirok etib, o‘z fikr-mulohazalarini bildirdi. Muzokara va muhokamalarda ishtirokchilar tomonidan Jamoa shartnomasining 2025-yilda bajarilishi qoniqarli, deb baholandi.

- Konferensiya delegatlar ishtirokida tahliliy va tanqidiy ruhda o‘tdi. 2025-yilda amalga oshirilgan ishlar, Jamoa shartnomasi majburiyatlarining bajarilishi atroflicha sarhisob qilindi, kelgusi vazifalar va rejalar belgilab olindi. Men ham unda o‘z fikr-mulohazalarim bilan ishtirok etdim, - deydi Markaziy kon boshqarmasi vakili Odilbek Qo‘ziyev.

Konferensiyada 2025-2027-yillarga mo‘ljallangan Jamoa shartnomasiga tegishli qo‘shimcha va o‘zgartishlar kiritilib, tasdiqlandi.

“NKMK” AJ Matbuot xizmati