15-may kuni Buyuk Britaniya poytaxti London shahrida xalqaro investitsiya hamjamiyati, banklar, institutsional investorlar hamda O‘zbekistonning yirik banklari va kompaniyalari vakillarini birlashtirgan “Uzbekistan Investor Day” tadbiri o‘tkazildi.

“Navoiy kon-metallurgiya kombinati” AJ bosh direktorining moliya, transformatsiya va xususiylashtirish bo‘yicha birinchi o‘rinbosari J.Xasanov boshchiligidagi delegatsiya forum dasturidagi tadbirlarda, shu jumladan, transformatsiya jarayonlariga bag‘ishlangan panel sessiyasida faol ishtirok etdi.

Shuningdek, investitsiya fondlari vakillari bilan bir qator ikki tomonlama uchrashuvlar o‘tkazilib, xalqaro investorlarga “NKMK” AJning 2025-yildagi faoliyati natijalari taqdim etildi, transformatsiya va barqaror rivojlanishning asosiy yo‘nalishlari muhokama qilindi.

Xalqaro moliya hamjamiyati bilan yaqin aloqalarni saqlab qolish “NKMK” AJning 2024-2025-yillarda xalqaro kapital bozoriga muvaffaqiyatli chiqib, 1,5 milliard AQSh dollari miqdoridagi korporativ obligatsiyalarni joylashtirganidan so‘ng investorlar bilan hamkorlikni mustahkamlash strategiyasining muhim qismi bo‘lib qolmoqda. Bu kompaniyaning O‘zbekistondagi eng yirik korporativ emitentlardan biri sifatidagi mavqeini yanada mustahkamlashga xizmat qiladi.

“NKMK” AJ Matbuot xizmati