Bugungi kunda Navoiy kon-metallurgiya kombinatining 7-gidrometallurgiya zavodida qayta ishlash quvvatlarini 10 mln. tonnaga oshirishga qaratilgan investitsiya loyihasi amalga oshirilmoqda.

2025-yilda kombinat va zavod mutaxassislarining saʼy-harakatlari bilan korxonada yangi jihozlarni ishga tushirish bo‘yicha keng ko‘lamli ishlar olib borildi. Ayni paytda zavodda 12 ta maydalash tegirmoni, 10 ta quyultirgich, 102 ta sorbsion qurilma yordamida texnogen chiqindilar qayta ishlanmoqda. Misol uchun o‘tgan yili zavodda 21,8 mln. tonna texnogen chiqindilar qayta ishlandi.

Investitsiya loyihasi doirasida joriy yilda zavodning maʼdan tayyorlash va g‘alvirlash uchastkalarida qurilish-montaj ishlari yakunlanib, quyultirish va sorbsiya sexlarida ishlar davom etmoqda. Shu bilan birga, taʼmirlash-mexanika sexi va reagentlarni saqlash omborini kengaytirish, maishiy bino va muhandislik kommunikatsiya tarmoqlarini qurish rejalashtirilgan.

- Zavodda suv resurslarini tejash ishlariga katta eʼtibor qaratilmoqda. Hozirgi vaqtda korxonada aylanma suvdan foydalanish darajasi 60 foizni tashkil etmoqda. Bu borada olib borilayotgan ishlar suv resurslariga bo‘lgan ehtiyojni kamaytirish imkonini bermoqda. Zavodda texnologik jarayonlarni boshqarishning mavjud avtomatlashtirilgan tizimlari modernizatsiya qilinib, boshqaruv jarayonida sunʼiy intellekt texnologiyalari joriy etilgan, - deydi 7-gidrometallurgiya zavodi bosh texnologi Arman Kamalov.

Korxona ishlab chiqarish quvvatlarini kengaytirish va zamonaviy texnologik yechimlarni joriy etish qayta ishlash hajmini oshiribgina qolmay, ekologik standartlarga rioya qilgan holda qimmatbaho metallarni ajratib olish samaradorligini sezilarli darajada oshirishga xizmat qiladi.

“NKMK” AJ Matbuot xizmati