Navoiy kon-metallurgiya kombinatining mineral resurs bazasini tashkil etadigan oltin konlarning aksariyati Qizilqum sahrosi kengliklarida joylashgan.

Tomdi tumanidagi “Besapantov” koni Markaziy kon boshqarmasi tarkibiga kiradigan istiqbolli konlardan biridir. Bugungi kunda konni o‘zlashtirish bo‘yicha oltin tarkibli maʼdan qazib olish ishlari jadallik bilan amalga oshirilmoqda.

“Besapantov” koni boshlig‘i Dilshod Jumaniyazovning maʼlum qilishicha:

“Hozirda kon tarkibidagi “Besapantov” va “Balpantov” karyerlarida murakkab kon-geologik tuzilishga ega maʼdanlarni qazib olish ishlari olib borilmoqda. Bunda burg‘ulash va portlatish ishlarini bajarishga alohida eʼtibor qaratilmoqda. Buning uchun “Epiroc” rusumli burg‘ulash uskunalari, “Hitachi”, “Komatsu”, “Liebherr” rusumli gidravlik ekskovatorlar, “Komatsu”, “Catarpillar” rusumli avtoag‘dargichlar kabi qariyb 60 ta og‘ir konchilik texnikalaridan keng foydalanilmoqda. Qazib chiqarilayotgan tog‘ jinslari temir yo‘l orqali 2-gidrometallurgiya zavodiga qayta ishlash uchun tashilyapti. Kelajakda “Besapantov” karyerining uzunligi qariyb 1 750 metr, eni 1 050 metr va chuqurligi 300 metrni hamda “Balpantov” karyerining uzunligi qariyb 1 370 metr, eni 1 350 metr va chuqurligi 200 metrni tashkil etadi. Yiliga konda 12 mln. tonnadan ortiq maʼdan qazib olinishi rejalashtirilgan.”

Xulosa o‘rnida aytish kerakki, “Besapantov” konini o‘zlashtirish bo‘yicha amalga oshirilayotgan ishlar kombinatda qimmatbaho metallarni ishlab chiqarish hajmini oshirishga xizmat qilmoqda.

“NKMK” AJ Matbuot xizmati