Navoiy kon-metallurgiya kombinati bo‘linmalarida ishlab chiqarish jarayonlarini modernizatsiyalash, konchilik texnikalari tarkibini muntazam yangilash muhim ahamiyatga ega.

Keyingi yillarda Shimoliy kon boshqarmasi tarkibidagi konlarda gidravlik va elektr tokida ishlaydigan ekskavatorlar, avtoag‘dargichlar, yuklagichlar, burg‘ilash uskunalari kabi zamonaviy konchilik texnikalari imkoniyatlaridan keng foydalanilmoqda. Joriy yilda kon boshqarmasi bo‘yicha 145 mln. kubometrdan ortiq tog‘ jinslarini qazib olish rejalashtirilgan.

“Qoqpatas va Dovg‘iztov oltin konlarida maʼdan qazib olish (III navbati)” investitsiya loyihasini amalga oshirish doirasida kon boshqarmasiga zamonaviy konchilik texnikalari keltirilmoqda. Xususan, “Dovg‘iztov” va “Sharqiy” konlarida ishlab chiqarish rejalarini o‘z vaqtida bajarilishini taʼminlash, ish unumdorligini oshirish maqsadida, joriy yilning iyun oyida kovshining hajmi 10 kubometr bo‘lgan, elektr tokida ishlaydigan yuqori texnik-iqtisodiy ko‘rsatkichlarga ega ekskavatorlar keltirildi.

Konlarda tog‘ jinslarini qazib olish jarayonida bu kabi ekskavatorlardan foydalanish yoqilg‘i sarfini kamaytirish, ishlab chiqarish tannarxini qisqartirishga xizmat qiladi.

“NKMK” AJ Matbuot xizmati