“Navoiy kon-metallurgiya kombinati” AJ faoliyatida xalqaro standartlarni joriy etish borasida tizimli ishlar olib borilmoqda. Xususan, kombinat boshqarmasi rahbar-xodimlari va mutaxassislari uchun korxona faoliyatida ekologik va ijtimoiy menejment tizimining qo‘llanilishiga bag‘ishlangan seminar o‘tkazildi.

“Global Management Consult” MChJ vakillari bilan hamkorlikda tashkil etilgan tadbirdan ko‘zlangan maqsad tadbir ishtirokchilarini ekologik va ijtimoiy menejment tizimining qo‘llanilishi bo‘yicha ishlab chiqilgan hujjatlar bilan tanishtirish hamda mazkur tizimni korxona faoliyatiga samarali joriy etish uchun zarur bo‘lgan boshqaruv qarorlarini muhokama qilishdan iborat edi.

Seminar davomida ishtirokchilar ekologik va ijtimoiy menejmentga xalqaro yondashuvlar, ISO 14001 standarti va Xalqaro moliya korporatsiyasi (IFC) faoliyati standartlari talablari bilan tanishtirildi. Ushbu tizimning samarali ishlashini taʼminlash, masʼuliyatni taqsimlash, kombinatning boshqaruv jarayonlariga ekologik va ijtimoiy jihatlarni integratsiya qilishga alohida eʼtibor qaratildi.

Shuningdek, “NKMK” AJning amaldagi tizimini diagnostika qilish natijalari va uni yana-da rivojlantirishning amaliy yo‘nalishlari alohida ko‘rib chiqildi. Ishtirokchilar xavf-xatarlar reyestrlarini yuritish, ichki tartib-qoidalarni qo‘llash, pudratchilar faoliyatini nazorat qilish va audit o‘tkazish masalalarini ham muhokama qilishdi.

“NKMK” AJ Matbuot xizmati