15-oktabr kuni “Navoiy kon-metallurgiya kombinati” AJda Kompaniya faoliyatining 2026-yil birinchi yarim yillikdagi yakunlari va transformatsiya dasturini amalga oshirish jarayoniga bag‘ishlangan navbatdagi investorlar bilan videokonferens aloqa orqali muloqot o‘tkazildi.

Tadbirda “NKMK” AJ rahbariyati tomonidan asosiy ishlab chiqarish va moliyaviy natijalar hamda operatsion samaradorlikni oshirish, korporativ boshqaruvni takomillashtirish va raqamli texnologiyalarni joriy etish bo‘yicha amalga oshirilgan ishlar taqdim etildi.

Bosh direktorning moliya, transformats iya va xususiylashtirish bo‘yicha birinchi o‘rinbosari Jaxongir Xasanov Kompaniya faoliyatining 2026-yil birinchi yarim yillikdagi moliyaviy va ishlab chiqarish natijalari to‘g‘risida so‘z yuritib, o‘tgan yilning mos davriga nisbatan sof tushum va sof foyda oshganini taʼkidladi. Shuningdek, taqdimotda asosiy moliyaviy ko‘rsatkichlar, qarz yukining past darajada saqlanib qolayotganligi hamda ishlab chiqarish quvvatlarini oshirish va mineral-xomashyo bazasini mustahkamlashga qaratilgan investitsiya dasturining amalga oshirilishi aks ettirildi.

Transformatsiya bo‘yicha direktor Sanjar Nazarov ishlab chiqarish va boshqaruv jarayonlari samaradorligini oshirishga qaratilgan transformatsiya dasturini amalga oshirish to‘g‘risida maʼlumot berdi. Korporativ boshqaruvni takomillashtirish, shaffoflik va axborot ochiqligini oshirish, xavf-xatarlarni boshqarish tizimini rivojlantirish va barqaror rivojlanish tashabbuslarini amalga oshirish bo‘yicha amalga oshirilayotgan ishlar qayd etildi. Kompaniyaning 2035-yilgacha bo‘lgan uzoq muddatli rivojlanish strategiyasini ishlab chiqish va operatsion samaradorlikni oshirish bo‘yicha tizimli chora-tadbirlarga alohida eʼtibor qaratildi.

Axborot texnologiyalari va raqamlashtirish bo‘yicha direktor Bahodir Davlatov Kompaniyaning raqamli transformatsiyasi va sunʼiy intellekt texnologiyalarini joriy etish bo‘yicha olib borilayotgan ishlar to‘g‘risida maʼruza qildi. Sunʼiy intellektni ishlab chiqarish va korporativ jarayonlarda, jumladan, konchilik ishlari, geologiya, metallurgiya, energetika, asbob-uskunalarga texnik xizmat ko‘rsatish, taʼminot va xodimlarni boshqarishda qo‘llashning asosiy yo‘nalishlari taqdim etildi. Xodimlarning sunʼiy intellekt sohasidagi kompetensiyalarini rivojlantirish va axborot xavfsizligini boshqarish tizimini takomillashtirishga alohida eʼtibor qaratildi. Kompaniyaning axborot xavfsizligini boshqarish tizimi ISO/IEC 27001:2023 xalqaro standartiga muvofiqligi tasdiqlanganligi taʼkidlandi.

Muloqot yakunida “NKMK” AJ rahbariyati tomonidan ishtirokchilarning Kompaniya faoliyati natijalari, investitsion istiqbollar va transformatsiya dasturini amalga oshirish bo‘yicha bildirilgan savollariga batafsil javob berildi.

Investorlar bilan videokonferens aloqa orqali doimiy muloqotlar Kompaniyaning investitsiya hamjamiyati bilan hamkorligini mustahkamlash, shaffoflikni oshirish, faoliyat natijalari, asosiy tashabbuslarni amalga oshirish jarayoni va kelgusidagi rivojlanish istiqbollari to‘g‘risidagi maʼlumotlarni izchil ravishda oshkor etish bo‘yicha olib borayotgan tizimli ishlarining amaliy tasdig‘idir.

“NKMK” AJ Matbuot xizmati