30-aprel – 2-may kunlari Navoiy kon-metallurgiya kombinati maʼmuriyati va kasaba uyushmasi Kengashi, yoshlar yetakchilari Kengashi tashabbusi bilan “NKMK” AJ bo‘linmalari yosh ishchi-xodimlari o‘rtasida sportning gandbol turi bo‘yicha “NKMK Bosh direktori kubogi” turniri o‘tkazildi.

Navoiy shahridagi “So‘g‘diyona” jismoniy tarbiya va sport majmuasining Gandbol zalida O‘zbekiston Respublikasi davlat mustaqilligining 35 yilligiga bag‘ishlangan turnirning tantanali ochilish marosimi bo‘lib o‘tdi. Ochilish marosimida “Navoiy kon-metallurgiya kombinati“ AJ Bosh direktori, O‘zbekiston gandbol federatsiyasi raisi Q.Sanaqulov ishtirok etib, jamoalarga musobaqa bellashuvlarida zafarlar tiladi. Tadbirda mamlakatimizda sport sohasiga qaratilayotgan katta eʼtibor, yoshlar uchun yaratilayotgan imkoniyatlar, sportni ommalashtirish bo‘yicha olib borilayotgan islohotlarning samarasi, shu jumladan, Navoiy kon-metallurgiya kombinatida gandbol sport turiga qaratilayotgan eʼtibor alohida taʼkidlandi.

Mazkur turnirda kombinat bo‘linmalarida faoliyat olib borayotgan yosh ishchi-xodimlardan tashkil topgan 9 ta jamoa o‘zaro kuch sinashib, g‘oliblik uchun bellashdi. Final o‘yinida Markaziy kon boshqarmasi va “NKMK” AJ boshqarmasi jamoalari o‘zaro kuch sinashdi. Turnirning hal qiluvchi o‘yinida Markaziy kon boshqarmasi jamoasi g‘alaba qozondi va kubok sohibiga aylandi. Kombinat boshqarmasi jamoasi 2-o‘rin, Shimoliy kon boshqarmasi jamoasi 3-o‘rinni qo‘lga kiritdi.

Turnir g‘oliblari qimmatbaho sovg‘alar bilan taqdirlandi.

“NKMK” AJ Matbuot xizmati