Navoiy shahridagi “NKMK” AJ O‘quv markazida Navoiy kon-metallurgiya kombinati maʼmuriyati, kasaba uyushmasi Kengashi, “Qizilqum” kon-texnika inspeksiyasi, Navoiy ixtisoslashtirilgan prokuraturasi, NKMK IIB hamkorligida ishchi-xodimlar uchun targ‘ibot-tashviqot tadbiri tashkil etildi.

Tadbirda Navoiy ixtisoslashtirilgan prokurori N.Tilavov, “NKMK” AJ Mehnat muhofazasi va texnika xavfsizligi bosh boshqarmasi boshlig‘i A.Tursunov, kasaba uyushmasi Kengashi raisi o‘rinbosari O.Temirov va boshqa masʼul rahbarlar “Ishlab chiqarishda mehnat muhofazasi va xavfsizlik texnikasi qoidalariga rioya etish hamda qonunbuzilishlarga yo‘l qo‘yilmaslik talablari” mavzusida maʼruzalari bilan ishtirok etishdi.

- Ishlab chiqarishda ehtiyotkorlik, mehnat xavfsizligi qoidalariga rioya etish nafaqat bu sohaga masʼul mutaxassislar, balki rahbarlar, har bir ishchi-xodimning vazifasidir. Tadbirda ushbu dolzarb mavzu masʼullar ishtirokida muhokama etilib, bu borada kelgusida amalga oshirilishi lozim bo‘lgan vazifalar belgilab olindi, - deydi “NKMK” AJ Mehnat muhofazasi va texnika xavfsizligi bosh boshqarmasi yetakchi mutaxassisi A.Saydulayev.

Joriy yilning birinchi choragi yakunlariga ko‘ra, ijobiy natijalarga erishgan bir guruh ishchi-xodimlar kasaba uyushmasi Kengashi tomonidan qimmatbaho sovg‘alar bilan rag‘batlantirildi.

“NKMK” AJ Matbuot xizmati