So‘nggi yillarda “Navoiy kon-metallurgiya kombinati” AJ hamda Navoiy davlat konchilik va texnologiyalar universiteti o‘rtasida ilm-fan va ishlab chiqarish integratsiyasi, muhandis kadrlarni tayyorlash, bitiruvchilarni ishga joylashtirish bo‘yicha mustahkam hamkorlik aloqalari yo‘lga qo‘yilgan.

Kombinat tomonidan amalga oshirilayotgan investitsion loyihalar doirasida yaratilayotgan yangi ish o‘rinlarini yosh kadrlar bilan taʼminlash muhim ahamiyatga ega. Bu maqsadda mazkur universitetning 2025-2026-o‘quv yili bitiruvchilari “NKMK” AJ maxsus komissiyasi tomonidan suhbatdan o‘tkazilib, korxona bo‘linmalariga ishga joylashtirish uchun yuborilmoqda. Bugungi kunga qadar suhbatdan muvafaqiyatli o‘tgan 333 nafar bitiruvchidan 258 nafari ishga joylashgan bo‘lsa, qolgan 75 nafarini ham ishga joylashtirish jarayonida.

- Navoiy kon-metallurgiya kombinatida oliy taʼlim muassasalari, shu jumladan, Navoiy davlat konchilik va texnologiyalar universiteti bitiruvchilarini ishga joylashtirishga alohida eʼtibor qaratilmoqda. Buning uchun birinchi galda bitiruvchining nazariy bilimi, qiziqishi, amaliy ko‘nikmalari hamda ishlab chiqarish jarayonida mustaqil mehnat qilishga tayyorgarligi inobatga olinadi. Bu esa yoshlarning o‘z mutaxassisligi bo‘yicha mehnat faoliyatini boshlashi, o‘z salohiyatini namoyon etishi uchun keng yo‘l ochadi, - deydi “NKMK” AJ Kadrlar boshqarmasi xodimlarni o‘qitish va rivojlantirish bo‘limi boshlig‘i A.Rizayev.

Yaqinda universitet bitiruvchilarining bir guruhi navbatdagi suhbatdan o‘tkazilib, ularning nazariy bilimlari, amaliy ko‘nikmalari o‘rganildi. Suhbat natijalariga ko‘ra, ular ishga joylashish uchun kombinat bo‘linmalariga yuboriladi.

“NKMK” AJ Matbuot xizmati