Navoiy kon-metallurgiya kombinatida tajriba-konstruktorlik ishlarini rivojlantirish, iqtidorli mutaxassislarni har tomonlama qo‘llab-quvvatlash maqsadida, Konstruktorlar kengashi tashkil etilib, ayni paytda samarali faoliyat olib bormoqda. Bugun yosh konstruktorlar ishtirokida ushbu kengashning navbatdagi yig‘ilishi o‘tkazildi.

- Bugungi kunda kombinat bo‘linmalarida 100 nafardan ortiq malakali muhandis-konstruktorlar mehnat qilmoqda. Ular o‘rtasida hamkorlik zanjirini yaratish kombinatda ushbu kengashni tuzishni taqoza etdi. Bu bilan, Uchquduqdagi konstruktor Marjonbuloqdagi hamkasbini tanishi, tajriba almashishi uchun sharoit yaratildi. Kengash o‘z faoliyatida ko‘plab qobiliyatli yoshlarni kashf etayotgani barchamizni quvontirmoqda. Ayni paytda ular tomonidan turli loyihalar bo‘yicha ish olib borilmoqda, - deydi “NKMK” AJ Konstruktorlar kengashi raisi Karimjon Abdullayev.

Malakali mutaxassislardan iborat to‘qqizta loyihalashtirish guruhi faoliyat olib borayapti. Har bir loyiha belgilangan mezonlar asosida baholanib, maʼqul deb topilganlari amaliyotga tavsiya etiladi va iqtisodiy samarador loyihalar mualliflari o‘rnatilgan tartibda rag‘batlantiriladi. Misol uchun, yaqinda 13 nafar loyiha mualliflari munosib taqdirlandi.

Konstruktorlik ishi oddiy vazifa emas, tinimsiz izlanish, intilish, iqtidor, bilim, tajriba va tafakkur talab etadi. Bu puxta ishlab chiqilgan murakkkab ilmiy-texnik loyiha, innovatsion g‘oya demakdir. Buni ushbu kasb egalari yaratadi. Kombinatda konstruktorlik maktabi shakllangan bo‘lib, kengash ularning ishini muvofiqlashtirgan holda, konstruktorlik loyihalarni tanlash va ommalashtirishda o‘ziga xos maslahat organi vazifasini bajarmoqda.

“NKMK” AJ Matbuot xizmati.