“Navoiy kon-metallurgiya kombinati” AJ tuzilmasida faoliyat yuritayotgan Komplayens xizmati kombinat barqaror rivojlanishining bir qismi bo‘lib, huquqiy va reputatsion xavflarni kamaytirish uchun kompaniya faoliyatining qonunlar, korporativ qoidalar va standartlarga muvofiqligini nazorat qiladi. 2025-yilning boshida korrupsiyaga qarshi kurashish faoliyati samaradorligini oshirishga qaratilgan 24 ta banddan iborat chora-tadbirlar dasturi tasdiqlangan edi.

Amalga oshirilgan tadbirlar korrupsiyaga qarshi faoliyat samaradorligini oshirish, shaffoflikni mustahkamlash va korporativ boshqaruv tizimini takomillashtirishga qaratilgan. Olib borilgan ishlar korxonaning yuqori darajadagi masʼuliyat va halollik tamoyillariga amal qilishini tasdiqladi.

Kombinatda korrupsiyaviy xavflarni oldini olish va qonunchilikka rioya etilishini taʼminlash maqsadida nazorat hamda profilaktika ishlari kuchaytirildi. Komplayens xizmati tomonidan bir qator tekshiruvlar, o‘quv mashg‘ulotlari va seminarlar tashkil etildi.

Yil davomida ichki hujjatlarga qo‘shimcha huquqiy va korrupsiyaga qarshi ekspertiza o‘tkazildi. Komplayens xizmati mutaxassislari tomonidan ko‘plab buyruqlar, farmoyishlar, shartnomalar va boshqa meʼyoriy xujjatlar o‘rganilib, ayrim hujjatlarni amaldagi qonunchilikka muvofiqlashtirish bo‘yicha tavsiyalar berildi.

Shuningdek, korxonaning asosiy jarayonlaridagi ehtimoliy korrupsiyaviy xavflar tekshirildi. Baholash natijalariga ko‘ra mavjud va ehtimoliy xavfli sohalar aniqlanib, ular bo‘yicha tegishli choralar ko‘rildi. Olib borilgan ishlar muammoli uchastkalarni yana bir bor aniqlashtirish va eng muhim nuqtalarda nazoratni kuchaytirish imkonini berdi. Xavflarni o‘z vaqtida aniqlash va bartaraf etish chorlari ko‘rildi.

Korrupsiyaning oldini olish va xodimlarning huquqiy savodxonligini oshirishga alohida eʼtibor qaratildi. Ishchi-xodimlar o‘rtaasida korrupsiyaga qarshi madaniyatni oshirish maqsadida 124 ta maʼrifiy tadbir o‘tkazilib, seminarlar, brifinglar va radio chiqishlar tashkil etildi. Ushbu tadbirlarda 10,5 ming nafardan ortiq ishchi-xodim ishtirok etdi.

Komplayens xizmati xodimlarining malakasini oshirish maqsadida 2025-yil yanvar-noyabr oylarida ular Xalqaro korrupsiyaga qarshi akademiyasi, Korrupsiyaga qarshi kurash agentligi, Huquqni muhofaza qilish organlari akademiyasi va xorijiy o‘quv markazlari tomonidan tashkil etilgan 19 ta ixtisoslashtirilgan kurs va treninglarni ishtirok etishdi. Bu esa xalqaro va milliy korrupsiyaga qarshi standartlar bo‘yicha mutaxassislarning ko‘nikmalarini oshirish imkonini berdi.

“NKMK” AJ rasmiy saytida ijtimoiy ahamiyatga ega maʼlumotlarni o‘z vaqtida joylashtirish, korrupsiyaga qarshi faoliyatga oid bo‘limlarni yangilash va fuqarolar murojaatlari uchun kanallarni kengaytirish taʼminlandi. Shuningdek, aholi va OAV bilan muloqotni mustahkamlash maqsadida brifinglar o‘tkazilib, ularda kombinat mutaxassislari tomonidan korrupsiyaga qarshi kurash bo‘yicha amalga oshirilayotgan ishlar va rejalar haqida batafsil maʼlumot berildi.

Kombinat faoliyatida ochiqlik va shaffoflikni taʼminlash, korrupsiyaga qarshi kurashish borasida ishchi-xodimlarning huquqiy ongi va madaniyatini oshirish maqsadida 9-dekabr – Xalqaro korrupsiyaga qarshi kurashish kuniga bag‘ishlab, joriy yilning 10-noyabr kunidan 10-dekabr kuniga qadar “Korrupsiyaga qarshi kurashish oyligi” o‘tkazildi. Mazkur oylik doirasida 20-noyabr kuni Navoiy shahrida OAV vakillari va jurnalistlar, kombinat ishchi-xodimlari uchun “Ochiq eshiklar kuni” tadbiri tashkil etildi.

Ushbu tadbirda taʼkidlanganidek, Korrupsiyaga qarshi kurashish agentligi tomonidan eʼlon qilingan 2024-yil yakunlari bo‘yicha korrupsiyaga qarshi kurashishdagi ishlari samaradorligi reyting baholash natijalariga ko‘ra, davlat organlari va tashkilotlari orasida “NKMK” AJ 96 ball bilan faxrli 1-o‘rinni egallab, korrupsiyaga qarshi kurashish bo‘yicha ishlari eng yuqori natijani qayd etdi.

2024-yilda “NKMK” AJda korrupsiyaga qarshi kurashish sohasida tashkil etilgan boshqaruv tizimi va mexanizmlar “Korrupsiyaga qarshi kurashish menejment tizimi” ISO 37001:2016 xalqaro standarti talablariga muvofiqligi “CERT International” tashkiloti tomonidan tashqi auditdan o‘tkazilib, mazkur xalqaro standart sertifikatini qo‘lga kiritgan edi. Joriy yilning 28-29-iyul kunlari “CERT International” tashkiloti tomonidan ushbu xalqaro standartning talablari bajarilishi yuzasidan birinchi kuzatuv auditi o‘tkazildi. Audit natijalariga ko‘ra, kombinat faoliyatining korrupsiyaga qarshi kurashish tizimi yana bir bor xalqaro standart talablariga muvofiq deb baholandi va tashkilotga berilgan mazkur sertifikat bir yil davomida amalda bo‘lishi tasdiqlandi.

Bugungi kunda kombinat faoliyatida ochiqlik va shaffoflikni taʼminlash, korrupsiyaviy harakatlarni oldini olish va bartaraf etishga katta eʼtibor qaratilayotganligi alohida taʼkidlab o‘tildi. Xususan, davlat organlari va tashkilotlarida 2024-yilda ochiqlik bo‘yicha amalga oshirilgan ishlarning samaradorligi va natijadorligini baholashga qaratilgan “Ochiqlik indeksi”da “NKMK” AJ 89.2 ball bilan ketma-ket uchinchi yil eng yuqori samaradorlik ko‘rsatkichlaridan birini qayd etib, 4-o‘rinni egalladi. Aksiyadorlik jamiyatlari kesimida esa kombinat 22 ta yirik sanoat korxonalari hamda kompaniyalar orasida 3-o‘ringa sazovor bo‘ldi.

“NKMK” AJ kelgusida ham o‘z faoliyatini xalqaro va milliy komplayens-nazorat standartlariga muvofiq izchil amalga oshirish, boshqaruvning barcha darajalarida halollik, ochiqlik va samaradorlikni taʼminlash, mamlakatimiz sanoatida korrupsiyaga qarshi samarali kurashish namunasini ko‘rsatishda davom etadi.

“NKMK” AJ Matbuot xizmati