9-may – Xotira va qadrlash kuni munosabati bilan Navoiy kon-metallurgiya kombinati maʼmuriyati va kasaba uyushmasi Kengashi tomonidan O‘zbekiston konchilik va metallurgiya sanoati faxriylari Kengashi bilan birga mehnat fronti faxriylari holidan xabar olinmoqda.

Bayram arafasida kombinat tizimida uzoq yillar mehnat qilgan, ayni paytda keksalik gashtini surayotgan yetti nafar mehnat fronti faxriylarini xotira va qadrlash kuni bilan tabriklash, ularga hurmat va ehtirom ko‘rsatish, minnatdorlik bildirish hamda ularni sharaflash maqsadida xonadonlariga tashrif buyurilmoqda.

Bugun kombinat maʼmuriyati, kasaba uyushmasi Kengashi, faxriylar Kengashi va yoshlar vakillari Navoiy shahrida yashovchi 96 yoshli Yelizaveta Tixonovna Bocharova hamda 97 yoshli Anna Nikolayevna Zininaning xonadonlarida bo‘lishdi.

Muloqot chog‘ida mehnat fronti faxriylari urush davridagi qiyinchiliklar haqida so‘zlab, bugungi kunlar, bebaho neʼmat bo‘lgan tinchlik qadriga yetish kerakligini, yurtimizda keksalarga bo‘lgan hurmat-eʼtibordan mamnunligini bildirdi.

- Bugun tinch va osoyishta yurtda yashayotganimizga shukr qilishimiz kerak. Men mehnat faoliyatimni Markaziy moddiy-texnika bazasida olib bordim. Qizim birga yashayman. Joriy yilda kasaba uyushmasi Kengashi va birga ishlagan hamkasblarim jamoasining ko‘magida xonadonimiz to‘liq taʼmirlab berildi. Ko‘rsatilgan yordamdan behad minnatdorman, - deydi mehnat fronti faxriysi Yelizaveta Bocharova.

“NKMK” AJ Matbuot xizmati