Navoiy kon-metallurgiya kombinatida xomashyo zaxiralarini qidirish va aniqlash bo‘yicha ishlarni amalga oshirish geologiya xizmati zimmasiga yuklangan. Geologiya-qidiruv ekspeditsiyasining 2-geologiya-qidiruv partiyasi bu yo‘nalishdagi ishlarni Shimoliy kon boshqarmasi tarkibidagi konlarda olib bormoqda.

100 nafardan ortiq geologiya sohasi xodimlari faoliyat olib borayotgan 2-geologiya-qidiruv partiyasi “Qoqpatas”, “Dovg‘iztov”, “Hojibo‘g‘ot” konlarining geologik sharoitlarini o‘rganish, xalqaro standardlarga muvofiq oltin zaxiralarini baholash, mavjud resurs bazasini kengaytirish ishlarini bajarib kelmoqda. Sohaga raqamli texnologiyalarni keng joriy etish maqsadida, konlarda olib borilayotgan geologiya-qidiruv ishlarining natijalari to‘g‘risidagi maʼlumotlar “Micromine” dasturiy taʼminoti yordamida raqamlashtirilmoqda.

- Bugungi kunda geologiya-qidiruv ishlarini bajarish uchun turli rusumdagi zamonaviy, yuqori ish unumdorligiga ega burg‘ilash uskunalaridan foydalanyapmiz. Buning hisobiga ish ko‘lami yildan-yilga ortib boryapti. 2025 yilda jami 25 ming metr burg‘ilash ishlari olib borilgan bo‘lsa, joriy yilda bu ko‘rsatkichni 36 ming metrga yetkazish rejalashtirilgan, - deydi 2-geologiya-qidiruv partiyasi boshlig‘i A.Ochilov.

Shuningdek, mazkur partiya geologik namunalarni saqlash uchun yangidan qurilgan va zamonaviy jihozlangan binoga ega. Bu olinayotgan namunalarga o‘z vaqtida ishlov berish va ularni laboratoriyaga jo‘natishda muhim ahamiyatga ega.

“NKMK” AJ Matbuot xizmati