Navoiy davlat konchilik va texnologiyalar universitetida “Navoiy kon-metallurgiya kombinati” AJ Yosh muhandislar kengashi hamda Konstruktorlar kengashining hamkorlikdagi yig‘ilish bo‘lib o‘tdi.

Kombinatda muhandislik va konstruktorlik yo‘nalishlarda olib borilayotgan ishlar hamda kelgusi rejalar, oliygoh bilan hamkorlikni yanada kengaytirish, shuningdek, o‘rganishlarda aniqlangan muammolar va ularning yechimlarini ko‘rib chiqishga bag‘ishlangan mazkur yig‘ilishda kengashlar a’zolari, “NKMK” AJ mutaxassislari, NDKTU rektori va professor-o‘qituvchilari hamda iqtidorli talabalari ishtirok etishdi.

Yig‘ilishda “NKMK” AJ Yosh muhandislar kengashi raisi Q.Xasanov va Konstruktorlar kengashi raisi K.Abdullayevlarning axborotlari tinglandi.

– Kun tartibi muhokamasida kengashlar rejalari ijrosi, faoliyatini yanada kuchaytirish bilan birga, ishtirokchilarning ham fikr-mulohazalari tinglandi. Muzokaralarda tajribali muhandis-konstruktorlar, mutaxassislar, universitet olimlari, yosh tadqiqotchilar tomonidan kengashlar faoliyatini keng targ‘ib qilish taklifi bildirildi. Shuningdek, ular tomonidan muammo va yechimlarini joyida ko‘rib chiqish uchun hududlarda sayyor yig‘ilishlarni ko‘proq o‘tkazish, har bir loyiha va ishlanmaning dolzarbligi, qanchalik iqtisodiy samaradorlik keltirishini shaffoflik bilan ko‘rib chiqish va baholash tavsiya etildi. Shu bilan birga, NKMK va NDKTU o‘rtasida bu borada samarali hamkorlikni olib borish masalasi yuzasidan ham kengashib olindi, – deydi “NKMK” AJ Yosh muhandislar kengashi raisi Qahramon Hasanov.

Yig‘ilishda kun tartibidagi masalalar muhokama etilib, kelgusi vazifalar belgilandi.

“NKMK” AJ Matbuot xizmati