Navoiy kon-metallurgiya kombinatida jismoniy va yuridik shaxslarning murojaatlari bilan ishlash, muammolarni joyiga borib o‘rganish, har bir murojaatni o‘z vaqtida ko‘rib chiqish hamda ijobiy yechim topishga alohida eʼtibor qaratib kelinmoqda.

Xususan, “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni va tegishli qonunchilik hujjatlari asosida kombinat hamda bo‘linmalar rahbariyatining shaxsiy va sayyor qabullari, ishchi-xodimlar bilan ochiq muloqotlar muntazam o‘tkazilmoqda. Murojaatlar ijrosini taʼminlash, ularni monitoring va sarhisob qilish tizimi yo‘lga qo‘yilgan.

2026-yilning birinchi yarim yilligida “NKMK” AJ rahbariyati nomiga jami 1 268 ta murojaat, shu jumladan, 656 tasi O‘zbekiston Respublikasi Prezidentining virtual va xalq qabulxonalari orqali, 252 tasi og‘zaki, 345 tasi yozma va 15 tasi elektron pochta orqali kelib tushgan.

- Joriy yilning o‘tgan davri mobaynida jismoniy va yuridik shaxslardan ishga joylashish, mehnat va bandlik, uy-joy (yotoqxona) ajratish, taʼlim, ijtimoiy himoya, sog‘likni saqlash, ish haqi va pensiya hamda boshqa masalalar yuzasidan murojaatlar kelib tushdi. Kombinat bosh direktori tomonidan 63 nafar, bosh direktor o‘rinbosarlari tomonidan 72 nafar fuqaro qabul qilindi, - deydi Jismoniy va yuridik shaxslarning murojaatlari bilan ishlashni nazorat qilish va muvofiqlashtirish bo‘limi boshlig‘i Shavqiddin Idiyev.

Shuningdek, Navoiy kon-metallurgiya kombinati bo‘linmalarida O‘zbekiston Respublikasi Prezidentining 2026-yil 1-apreldagi “Aholi bilan muloqot tizimini samarali tashkil qilish bo‘yicha qo‘shimcha chora-tadbirlar to‘g‘risida”gi farmoni ijrosini taʼminlash, mazmun-mohiyatini xodimlarga yetkazish bo‘yicha seminar va tadbirlar o‘tkazildi. Mazkur tadbirlarda korxona bo‘linmalarida jismoniy va yuridik shaxslarning murojaatlari bilan ishlash bo‘yicha masʼul xodimlarga aholi bilan muloqot tizimini takomillashtirish, fuqarolarning davlat organlari va tashkilotlariga murojaatlari bilan ishlash samaradorligini oshirish hamda murojaatlarni o‘z vaqtida va sifatli ko‘rib chiqish bo‘yicha belgilangan vazifalar tushuntirildi.

Davr talabidan kelib chiqib, kombinatda murojaatlar bilan ishlashni yanada yaxshilash, fuqarolarning muammolarini hal etishga ko‘maklashish ustuvor vazifalardan biri bo‘lib qolaveradi.

“NKMK” Matbuot xizmati