“Navoiy kon-metallurgiya kombinati” AJ Boshqaruvi raisi – Bosh direktori, texnika fanlari doktori, professor Quvondiq Sanaqulov Rossiya Muhandislik akademiyasining xorijiy aʼzosi (akademigi) etib saylandi.

Rossiya Muhandislik akademiyasining faoliyati muhandislik fanlarini rivojlantirish, innovatsion texnologiyalarni amaliyotga joriy etish, ilm-fan va ishlab chiqarish integratsiyasini kuchaytirish, muhandislik taʼlimini takomillashtirish, sanoatni modernizatsiya qilish hamda yuqori texnologiyali iqtisodiyotni shakllantirish hamda ana shu yo‘nalishlarda xalqaro ilmiy hamkorlikni mustahkamlashga qaratilgan.

Rossiya Muhandislik akademiyasiga aʼzolik (akademiklik) eng yuqori ilmiy-muhandislik eʼtiroflaridan hisoblanadi. Akademiyaga muhandislik sohasida ulkan ilmiy va amaliy natijalarga erishgan, yangi texnologiyalar yaratgan, ishlab chiqarishga yuqori samarali innovatsiyalarni joriy etgan, mamlakat sanoati va muhandislik fanlari rivojiga salmoqli hissa qo‘shgan insonlar saylanadi. Akademik unvoni muhandislik sohasidagi ulkan xizmatlari, ilmiy maktab yaratish, muhim texnologik yechimlarni ishlab chiqish va amaliyotga tatbiq etish hamda sanoat tarmoqlarini rivojlantirishdagi katta shaxsiy hissasi uchun beriladi.

Xorijiy davlatlar olimlari uchun esa xorijiy a’zo (akademik) maqomi joriy etilgan. Bu unvon jahon ilm-fani, muhandislik, taʼlim va innovatsion texnologiyalar rivoji va xalqaro ilmiy hamkorlikni mustahkamlashga munosib hissa qo‘shgan muhandis-olimlarga beriladi.

Quvondiq Sanaqulov Rossiya Muhandislik akademiyasining xorijiy a’zosi (akademigi) etib saylandi. Bu, nafaqat olimning ko‘p yillik samarali ilmiy va muhandislik faoliyatiga berilgan yuksak baho, balki O‘zbekiston muhandislik maktabi, Navoiy kon-metallurgiya kombinatida shakllangan ilmiy salohiyat va boy tajribaning xalqaro miqyosda eʼtirof etilganining yorqin namunasidir.

Bugun Navoiy kon-metallurgiya kombinati va Navoiy davlat konchilik va texnologiyalar universiteti jamoalarining vakillari, Quvondiq Sanaqulovning hamkasblari uni Rossiya Muhandislik akademiyasining xorijiy aʼzoligi (akademikligi)ga saylanganligi bilan tabrikladilar.

Taniqli olim Quvondiq Sanaqulov Tabiat va jamiyat fanlari xalqaro akademiyasi, Yevroosiyo konchilik fanlari akademiyasi, Turon fanlar akademiyasi akademigi, shuningdek, Avstriyaning Vena xalqaro universiteti hamda Rossiyaning Ural federal universiteti faxriy professori unvonlariga ham ega.

“NKMK” AJ Matbuot xizmati