Qozog‘istonning Ostona shahrida tog‘-kon sanoati, investitsiya hamjamiyati, ilmiy doiralar va davlat organlari vakillarini birlashtirgan “KazMinex” 16-xalqaro konchilik va geologiya forumi hamda ko‘rgazmasi o‘tkazildi.

Mazkur forumda “Navoiy kon-metallurgiya kombinati” AJ delegatsiyasi ham ishtirok etdi. Forumda asosiy eʼtibor konchilik va metallurgiya sohasini barqaror rivojlantirish, investitsiyalarni jalb qilish, mineral resurslarni o‘zlashtirish samaradorligini oshirish va zamonaviy qo‘shilgan qiymat zanjirlarini shakllantirish masalalariga qaratildi. Shuningdek, ilg‘or texnologiyalarni joriy etish, ishlab chiqarish jarayonlarini raqamlashtirish, sanoat xavfsizligi va ekologik masʼuliyat masalalari muhokama qilindi.

Ko‘rgazmada tog‘-kon sanoati uchun zamonaviy texnologik yechimlar, uskunalar va xizmatlar, jumladan, geologiya-qidiruv, qazib olish va qayta ishlash yo‘nalishlaridagi innovatsiyalar, samaradorlikni oshirishga qaratilgan sunʼiy intellekt sohasidagi raqamli yechimlar taqdim etildi.

Forum doirasida “NKMK” AJ delegatsiyasi tomonidan xalqaro kompaniyalar, moliyaviy hamjamiyat vakillari va soha mutaxassislari bilan bir qator amaliy uchrashuvlar o‘tkazilib, hamkorlik istiqbollari va ilg‘or tajribalar almashinuvi muhokama qilindi.

Kompaniyaning “KazMinex” xalqaro forumidagi ishtiroki uning xalqaro hamkorlikni rivojlantirish, zamonaviy innovatsion yechimlarni joriy etish hamda mintaqaning konchilik va metallurgiya sohasida strategik yetakchilaridan biri sifatidagi mavqeini mustahkamlashga qaratilgan izchil yo‘nalishini tasdiqlaydi.

“NKMK” AJ Matbuot xizmati