Navoiy kon-metallurgiya kombinati korxonalarida ishlab chiqarish jarayonlarini modernizatsiyalash, konchilik texnikalari tarkibini muntazam yangilashga katta eʼtibor qaratilmoqda.

So‘nggi yillarda Shimoliy kon boshqarmasi tarkibidagi konlarda gidravlik ekskavatorlar, avtoag‘dargichlar, yuklagichlar, burg‘ilash uskunalari kabi zamonaviy konchilik texnikalari imkoniyatlaridan keng foydalanilmoqda. 2025-yilda kon boshqarmasi bo‘yicha 140 mln. kubometrdan ortiq tog‘ jinslari qazib olingan bo‘lsa, 2026-yilda bu ko‘rsatkichni 145 mln. kubometrdan oshirish rejalashtirilgan.

“Qoqpatas va Dovg‘iztov oltin konlarida maʼdan qazib olish (III navbati)” investitsiya loyihasini amalga oshirish doirasida kon boshqarmasiga zamonaviy konchilik texnikalari keltirilmoqda. Xususan, “Dovg‘iztov”, “Sharqiy”, “Auminzo-Amantoy” konlarida ishlab chiqarish rejalarini o‘z vaqtida bajarilishini taʼminlash, ish unumdorligini oshirish maqsadida, joriy yilning boshidan kovshining hajmi 10 kubometr bo‘lgan, elektr tokida ishlaydigan yuqori texnik-iqtisodiy ko‘rsatkichlarga ega ekskavatorlar ishga tushirildi. Bu bilan Shimoliy kon boshqarmasida elektr tokida ishlaydigan va gidravlik ekskavatorlarning jami soni 71 taga yetdi.

Konlarda tog‘ jinslarini qazib olish jarayonida bu kabi elektr tokida ishlaydigan ekskavatorlardan foydalanish yoqilg‘i sarfini kamaytirish, ishlab chiqarish tannarxini qisqartirishga xizmat qiladi.

“NKMK” AJ Matbuot xizmati