Navoiy shahrida “AI Alliance Uzbekistan” tomonidan tashkil etilgan sunʼiy intellekt texnologiyalari sohasidagi “National AI Hackathon” umummilliy tadbirining viloyat bosqichi o‘tkazildi.

Mazkur tadbirda “Navoiy kon-metallurgiya kombinati” AJ Axborot-kommunikatsiya texnologiyalari boshqarmasi va Ishlab chiqarishni avtomatlashtirish boshqarmasi mutaxassislari ekspertlar sifatida ishtirok etishdi. Kombinat vakillari jamoalarga g‘oyalarni takomillashtirish, SI-yechimlarini yaratish, ushbu yechimlarning ishlab chiqarishda qo‘llanilishini baholashda amaliy yordam berishdi.

To‘rt kun davomida jamoalar sog‘liqni saqlash, taʼlim, biznes va tog‘-kon sanoati kabi yo‘nalishlar bo‘yicha SI-yechimlarini ishlab chiqishdi. Tog‘-kon sanoati yo‘nalishi “NKMK” AJ tomonidan taqdim etildi.

Tadbir yakuniga ko‘ra, tog‘-kon sanoati yo‘nalishida “Armada”, “IT-Park Navoiy” va “Kimyogarlar” jamoalarining loyihalari eʼtirof etildi. Ular tomonidan kompyuter ko‘rish texnologiyasi yordamida konveyer lentalari holatini nazorat qilish, sanoat xavfsizligi bo‘yicha VR-o‘qitish, texnik va meʼyoriy hujjatlar bilan ishlash uchun SI yordamchisini yaratish bo‘yicha yechimlar taqdim etildi.

“NKMK” AJ mutaxassislarining xakatondagi faol ishtiroki tadbirning tog‘-kon sanoati yo‘nalishiga amaldagi ishlab chiqarish vazifalarini kiritish va ishtirokchilarning loyihalarini amaliyotga yaqinlashtirish imkonini berdi. Natijada, kelgusida tog‘-kon sanoati korxonalarida qo‘llanilishi mumkin bo‘lgan mazmunli va istiqbolli yechimlar taqdim etildi.

G‘olib jamoalar aʼzolari tadbir tashkilotchilari tomonidan qimmatbaho sovg‘alar bilan taqdirlandi.

“NKMK” AJ Matbuot xizmati.