17-18-avgust kunlari Eron Islom Respublikasi Markaziy viloyati delegatsiyasi Navoiy viloyatida tashrif bilan bo‘lib turibdi. Mazkur delegatsiya tarkibidan qishloq xo‘jaligi, oziq-ovqat sanoati, metallurgiya, konchilik, neft-gaz, kimyo va avtomobilsozlik kabi sohalarning 50 dan ortiq vakillari o‘rin olgan.

Tashrif doirasida ikki hudud vakillari ishtirokida hududlararo biznes-forum, Navoiy viloyatida ishlab chiqarilayotgan mahalliy mahsulotlar ko‘rgazmasi, investitsiya va eksport imkoniyatlari taqdimotlari, mahalliy ishlab chiqarish korxonalariga tashriflar o‘tkazilmoqda.

Xususan, Eron Islom Respublikasi Markaziy viloyatining bir guruh tadbirkorlari Navoiy kon-metallurgiya kombinati faoliyati bilan tanishish, korxona mutaxassislari bilan muloqot qilish maqsadida, Navoiy mashinasozlik zavodiga tashrif buyurdi. Dastlab xorijiy delegatsiya vakillari zavodning yirik sexlarida bo‘ldi. Zavod direktori J.Hayitov ularni korxona ish jarayonlari va ishlab chiqarish quvvatlarini oshirish bo‘yicha olib borilayotgan amaliy ishlar bilan yaqindan tanishtirdi.

Shuningdek, mehmonlar uchun Navoiy shahridagi “NKMK tarixi” muzeyiga ekskursiya tashkil etildi. Ekskursiya davomida ular kombinat tarixi, keyingi yillarda ishga tushirilgan yangi korxonalar hamda noyob tabiiy qazilmalarga boy Qizilqum zaminining qadimiy tarixi va buguni haqida so‘zlaydigan eksponatlar bilan tanishtirildi.

“NKMK” AJ Matbuot xizmati