30-sentabr – 6-oktabr kunlari “Navoiy kon-metallurgiya kombinati” AJ Boshqarmasi Korporativ kotibiyati, Moliya departamenti, ESG va Yuridik bo‘limi vakillari davlat korxonalari vakillari delegatsiyasi tarkibida Ozarbayjonning Boku shahrida “I-Talent” konsalting kompaniyasi tomonidan tashkil etilgan amaliy seminar-treningda ishtirok etishdi.

Tadbir dasturi korporativ boshqaruvga zamonaviy yondashuvlar, ESG, “G20/OECD” korporativ boshqaruv tamoyillari va xalqaro amaliyotni hisobga olgan holda boshqaruv qarorlari sifatini oshirish masalalariga bag‘ishlandi.

Seminar ishtirokchilar yetakchi davlat korxonalari faoliyatidan amaliy misollarni ko‘rib chiqib, korporativ qarorlarni tayyorlash, qabul qilish va ijro etishda yuzaga kelishi mumkin bo‘lgan xavf-xatarlar va manfaatlar to‘qnashuvlari hamda ularni o‘z vaqtida aniqlash va boshqarish yondashuvlarini muhokama qilishdi. Tadbirning amaliy qismida ishtirokchilar direktorlar kengashlarining ishbilarmonlik simulyatsiyasida ishtirok etib, unda mavjud xavf-xatarlar, manfaatdor tomonlarning manfaatlari va ehtimoliy oqibatlarni hisobga olgan holda turli xil boshqaruv vaziyatlari va qarorlar qabul qilishni ko‘rib chiqishdi.

Seminar doirasida Ozarbayjonning “AzerGold”, “PASHA Holding” va “Agalarov Development” kabi yetakchi kompaniyalari vakillari bilan tajriba almashish, ularning korporativ boshqaruv va boshqaruv jarayonlari sohasidagi amaliy yondashuvlari bilan tanishish maqsadida tanishuv uchrashuvlari o‘tkazildi.

Korporativ boshqaruv sohasidagi kompetensiyalarni rivojlantirish “NKMK” AJning boshqaruv tizimini takomillashtirish, shaffoflik va hisobdorlikni oshirish hamda xalqaro amaliyotlarni qo‘llash bo‘yicha izchil ishlarining bir qismidir.

“NKMK” AJ Matbuot xizmati