9-10-sentabr kunlari “Navoiy kon-metallurgiya kombinati” AJda O‘zbekiston Respublikasi Tog‘-kon sanoati va geologiya vazirligi bilan hamkorlikda “NKMK” AJda raqamli texnologiyalar va sunʼiy intellektni qo‘llash” mavzusida seminar o‘tkazilmoqda.

Tadbirda Tog‘-kon sanoati va geologiya vazirligi, “NKMK” AJ, “OKMK” AJ, “Navoiyuran” DK, “O‘zbekiston texnologik metallar kombinati” AJ, “O‘zmetkombinat” AJ, “O‘zbek geoligiya qidiruv” AJ hamda “O‘zbekko‘mir” AJ vakillari ishtirok etmoqda.

Seminarni ochib bergan tog‘-kon sanoati va geologiya vaziri o‘rinbosari – Texnologik transformatsiya markazi direktori O.Fayzullayev tarmoq korxonalarining raqamlashtirish va sunʼiy intellektni joriy etish borasidagi saʼy-harakatlarini birlashtirish muhimligini taʼkidladi. Shuningdek, raqamli yechimlarni muvaffaqiyatli joriy etish bo‘yicha amaliy tajriba almashish, samarali ishlanmalarni ommalashtirish va ularni boshqa korxonalarda ham tatbiq etish masalalariga alohida eʼtibor qaratildi.

Tadbirda “NKMK” AJ axborot texnologiyalari va raqamlashtirish bo‘yicha direktori B.Davlatov ishtirok etib, asosiy ishlab chiqarish va korporativ jarayonlarni kompleks raqamlashtirish, maʼlumotlarni boshqarish bo‘yicha yagona tahliliy tizimni shakllantirish hamda kombinat faoliyatining ustuvor yo‘nalishlarida sunʼiy intellekt texnologiyalarini qo‘llash masalalari bo‘yicha maʼruza qildi. Maʼruzada katta hajmdagi ishlab chiqarish maʼlumotlarini tahlil qilish, texnologik jarayonlar va uskunalar holatini prognoz qilish, boshqaruv qarorlarining tezkorligi va sifatini oshirish imkonini beruvchi sunʼiy intellekt yechimlarini rivojlantirishga alohida eʼtibor qaratildi.

Ishlab chiqarishni avtomatlashtirish boshqarmasi boshlig‘i V.Po‘latov texnologik jarayonlarni boshqarishning avtomatlashtirilgan tizimlarining bugungi holati va rivojlanish istiqbollari, kombinat ishlab chiqarish obyektlari uchun boshqaruv shkaflari hamda asbob-uskunalarni tayyorlash hamda metallurgiya jarayonlarida sunʼiy intellektdan foydalanish masalalari haqida maʼruza qildi.

Seminar ishtirokchilari tomonidan tog‘-kon va metallurgiya ishlab chiqarishini raqamlashtirishning zamonaviy yondashuvlari – texnologik jarayonlarni avtomatlashtirish, kon ishlarini dispetcherlashtirish, maʼlumotlarni markazlashgan holda yig‘ish va tahlil qilish, MES tizimlarini rivojlantirish hamda sunʼiy intellekt texnologiyalarini qo‘llash masalalari muhokama qilinmoqda.

Joriy etilgan raqamli yechimlar ishlab chiqarish samaradorligini oshirish, bekor turib qolishlarni qisqartirish va energiya sarfini kamaytirishga xizmat qilmoqda. Keyingi bosqichda sunʼiy intellekt texnologiyalaridan prognozlash, ishlab chiqarish jarayonlarini optimallashtirish va boshqaruv qarorlarini qabul qilishni qo‘llab-quvvatlashda yanada kengroq foydalanish ko‘zda tutilgan.

Seminar doirasida raqamlashtirishning asosiy yo‘nalishlari bo‘yicha mavzuga oid sessiyalar ham o‘tkazilmoqda. Ularda korxonalar vakillari amalga oshirilgan loyihalar bo‘yicha tajriba almashib, raqamli texnologiyalar va sunʼiy intellektni joriy etishning amaliy natijalari, hamkorlikdagi ishlarni rivojlantirish va samarali yechimlarni keng miqyosda tatbiq etish istiqbollari ko‘rib chiqilmoqda.

“NKMK” AJ Matbuot xizmati