Dunyoda iqlim o‘zgarishi va suv resurslarining taqchilligi sharoitida suvdan oqilona foydalanish asosan Qizilqum sahrosi hududida faoliyat yuritayotgan Navoiy kon-metallurgiya kombinati uchun ustuvor vazifa hisoblanadi.

Suvdan samarali foydalanish korxonada tejamkor raqamli texnologiyalarni joriy etishni talab etmoqda. Bu yo‘nalishda kombinat Yosh muxandislar kengashi mutaxassislari tashabbusi bilan Tarmoqlar va podstansiyalar sexi va Ishlab chiqarishni avtomatlashtirish boshqarmasi Nazorat-o‘lchov asboblari va avtomatika markaziy laboratoriyasida suv resurslarini 5 barobargacha tejash imkonini beruvchi avtomatik sug‘orish boshqaruv tizimi yaratilib, ushbu sexda yangidan barpo etilgan bog‘da sinab ko‘rildi.

- Loyiha ustida ish boshlashdan avval mavjud tizimlarning kamchiliklari, ayniqsa, suvning behuda sarflanishi va tuproqning meʼyoridan ortiq namlanib ketish holatlari o‘rganildi. Shu paytgacha qo‘llanib kelingan sug‘orish usuli kutilgan natijani bermayotgan edi. Bunda bir qancha jiddiy muammolar mavjud edi. Nazoratning yo‘qligi, yaʼni tuproqning haqiqiy namligi bilinmasdi, natijada yer yo haddan tashqari ko‘p sug‘orilib yuborilar yoki suv tegmay qurib qolardi. Tuproqning past-balandligi hisobga olinmasdi. Oqibatda pastlik joylarda suv to‘plansa, balandliklar quruq qolaverardi. Jarayon doimiy ishchi kuchini talab qilardi va suv behuda isrof bo‘lardi. Biz yaratgan avtomatik sug‘orish boshqaruv tizimi zamonaviy elektronika, aqlli sensorlar va intellektual boshqaruv texnologiyalari yordamida kamchiliklarni to‘liq bartaraf etmoqda, - deydi Yosh muxandislar kengashi aʼzosi, Avtomatlashtirilgan nostandart vositalarni tayyorlash laboratoriyasi boshlig‘i Sardor Norbayev.

Bugungi kunda kombinatning yosh muxandislari tomonidan yaratilgan ushbu qurilma barcha bo‘linmalarda joriy etilishi rejalashtirilgan.

“NKMK” AJ Matbuot xizmati