“Navoiy kon-metallurgiya kombinati” aksiyadorlik jamiyati (“NKMK” AJ) 2026-yilning birinchi yarim yilligi uchun moliyaviy hisobotning xalqaro standartlari bo‘yicha moliyaviy natijalarni e’lon qiladi.

Asosiy faktlar

2026-yilning birinchi yarim yilligida Kompaniyaning sof tushumi 7 067 mln. AQSh dollarini tashkil etdi, bu 2025-yilning birinchi yarim yilligiga (4 715 mln. AQSh dollari) nisbatan 49,9% ga yuqori. O‘sishning asosiy omili London qimmatbaho metallar birjasida (LBMA) oltin narxining sezilarli darajada oshishi bo‘ldi, bunda oltin ishlab chiqarish hajmi 1,51 mln. troy unsiyani tashkil etib, 2025-yilning birinchi yarim yilligiga (1,54 mln. troy unsiya) nisbatan 1,8% ga kam.
Ishlab chiqarish va qo‘llab-quvvatlash bo‘yicha umumiy xarajatlar (AISC) 2026-yilning birinchi yarim yilligida bir unsiya uchun 1 647 AQSh dollarini tashkil etdi, bu 2025-yilning birinchi yarim yilligida qayd etilgan 1 164 AQSh dollariga nisbatan yuqoridir. Ko‘rsatkichning o‘sishiga asosiy omillar sifatida oltinning yuqori narxlari fonida royalti (yer qa’ridan foydalanganlik uchun soliq) to‘lovlarining ko‘payishi (AISC tarkibida 31% ulushga ega) hamda inflyatsiyaning sarflanadigan materiallar qiymatiga ta’siri bo‘ldi.

AISC ko‘rsatkichining o‘sishiga qo‘shimcha omili “Muruntov” konida o‘rta va uzoq muddatli istiqbolda ishlab chiqarish hajmini oshirishga qaratilgan “Muruntov konini o‘zlashtirish — V navbat II bosqich” investitsion loyihasi doirasidagi tuproqning ustki qatlamlarni olib tashlash ishlariga salflangan xarajatlarining ortishi bo‘ldi.

2025-yilning birinchi yarim yilligiga (12 892,91 UZS/USD) qaraganda, 2026-yilning birinchi yarim yilligida (12 102,41 UZS/USD) o’zbek so‘mining AQSh dollariga nisbatan 6,1% ga mustahkamlanishi, AISC ko‘rsatkichining bir unsiya uchun 101 AQSh dollariga oshishiga olib keldi. Bu esa ko‘rsatkichning umumiy o‘sishidan 8,7% ni tashkil etdi.

“NKMK” AJ jahonda oltin ishlab chiqaruvchi yirik kompaniyalar orasida AISC darajasi bo‘yicha yetakchi o‘rnini saqlab qolmoqda.

Moslashtirilgan EBITDA ko‘rsatkichi 4 889 mln. AQSh dollarini tashkil etdi, bu 2025-yilning birinchi yarim yilligida qayd etilgan 3 060 mln. AQSh dollariga nisbatan 59,8% ga yuqori. Oltin narxlari va tushumlarning ichlab chiqarish xarajatlariga nisbatan tezroq o‘sishi 2026-yilning birinchi yarim yilligida moslashtirilgan EBITDA marjasining 69,2% gacha oshishiga imkon berdi (2025-yilning birinchi yarim yilligida — 64,9%).
Investitsion faoliyatga yo‘naltirilgan sof pul mablag‘lari (Cash CAPEX) 543 mln. AQSh dollarini tashkil etdi, bu 2025-yilning birinchi yarim yilligida qayd etilgan 412 mln. AQSh dollariga nisbatan 31,8% ga ko‘pdir. Investitsiyalar asosan amaldagi konlarda ishlab chiqarish quvvatlarini kengaytirishga, jumladan, tog‘-kon texnikasi parkini kengaytirish hamda resurs bazasini oshirish maqsadida geologiya-qidiruv loyihalarini rializatsiya qilishga yo‘naltirildi.
Kompaniyaning qarz yuklamasi (sof qarzning moslashtirilgan EBITDA^TTM ga nisbati) 2025-yilning birinchi yarim yilligida 0,5x bo‘lgan bo‘lsa, 2026-yilning birinchi yarim yilligida 0,3x gacha yaxshilandi, bu esa Kompaniyaning moliyaviy intizomi saqlanib qolayotganini tasdiqlaydi.

2026-yil 30-iyun holatiga ko‘ra, “NKMK” AJning qarz portfeli asosan quyidagilardan iborat:

2025-yil may oyida London fond birjasida joylashtirilgan 500 mln. AQSH dollari miqdoridagi xalqaro obligatsiyalar;
2024-yil oktabr oyida joylashtirilgan 1 mlrd. AQSh dollari miqdoridagi xalqaro obligatsiyalar.

Natijada, qarz portfeli bo‘yicha o‘rtacha samarali foiz stavkasi 2026-yilning birinchi yarim yilligida yillik 6,67% gacha pasaydi, 2025-yilning birinchi yarim yilligida esa bu ko‘rsatkich 7,71% ni tashkil etgan, bu esa qarzning xizmat ko’rsatish xarajatlarini optimallashtirishga va hisoblangan foizlar bo‘yicha moliyaviy xarajatlarni kamaytirishga yordam berdi.

PRESS-RELIZ

Matbuot xizmati