O‘zbekiston Respublikasi Tog‘-kon sanoati va geologiya vazirligining “Texnologik jarayonlarda operatsion samaradorlikni oshirish” yo‘nalishidagi ekspertlar guruhi Navoiy kon-metallurgiya kombinatiga tashrif buyurdi.

Kombinat boshqarmasida vazirlikning ekspertlar guruhi vakillari va “NKMK” AJ rahbar-xodimlari, mutaxassislari o‘rtasida uchrashuv o‘tkazildi. Uchrashuvda tog‘-kon sanoati va geologiya sohasini texnologik transformatsiya qilish va sunʼiy intellekt texnologiyalarini joriy etish, kombinatda operatsion samaradorlikni oshirish bo‘yicha amalga oshirilayotgan ishlar va kelgusidagi rejalar, ratsionalizatorlik takliflarini ishlab chiqarish jarayonlariga tadbiq etish va boshqa masalalar muhokama etildi.

Muloqot davomida kombinat mutaxassislari tomonidan operatsion samaradorlikni oshirish bo‘yicha amalga oshirilayotgan ishlar, asosiy tashabbuslar va erishilgan iqtisodiy natijalar, operatsion samaradorlikni oshirishdagi tashabbuslarning KPI ko‘rsatkichlari, korxonada joriy etilgan ratsionalizatorlik takliflari jamlangan ratsionalizatorlik portali to‘g‘risida maʼlumot berildi.

Shuningdek, uchrashuvda kun tartibidagi masalalar yuzasidan fikr-mulohazalar bildirilib, mavjud muammolarni bartaraf etish, tashabbuslarni o‘z vaqtida amalga oshirish va ularning natijadorligini taʼminlash bo‘yicha takliflar ilgari surildi.

“NKMK” AJ Matbuot xizmati