Navoiy kon-metallurgiya kombinati jamoasi barcha ishlab chiqarish rejalarini ortig‘i bilan bajarib, O‘zbekiston Respublikasi davlat mustaqilligining 35 yilligini mehnat yutuqlari bilan kutib olmoqda.

Korxonada ishchi-xodimlarni ijtimoiy himoya qilish, ularning xavfsiz ishlashi uchun mehnat sharoitlarini yaxshilash muhim ahamiyatga ega. Bu borada kombinat maʼmuriyati va kasaba uyushmasi Kengashi hamkorlikda eʼtirofga molik xayrli ishlarni amalga oshirib kelmoqda.

Mustaqillik bayrami arafasida ana shunday obyektlardan biri – Zarafshon qurilish boshqarmasi ishchi-xodimlari uchun Zarafshon shahrida bo‘sh turgan ikki qavatli bino qayta taʼmirlanib, 220 o‘rinli yotoqxona foydalanishga topshirildi.

Ushbu yotoqxona ochilishiga bag‘ishlab o‘tkazilgan tadbirda “Navoiy kon-metallurgiya kombinati” AJ rahbariyati, Zarafshon shahar hokimligi vakillari, Zarafshon qurilish boshqarmasi mutaxassislari ishtirok etishdi. Tadbirda mamlakatimizda olib borilayotgan insonparvarlik siyosati, odamlarni rozi qilish hamda bu borada kombinatda ishchi-xodimlarni ijtimoiy himoya qilish, ular uchun munosib ish va yashash sharoitlarini yaratib berish bo‘yicha amalga oshirilayotgan keng ko‘lamli ishlar haqida fikr-mulohazalar bildirildi.

- Keyingi yillarda Yangi O‘zbekistonning har bir go‘shasidagi ijobiy o‘zgarishlar yurtdoshlarimizmi quvontirmoqda. Mustaqillik bayrami arafasida bu yotoqxonaning ishga tushirilishidan juda xursand bo‘ldik. Kombinat maʼmuriyati va kasaba uyushmasi Kengashiga rahmat! Doimiy ishchi-xodimlar uchun qayg‘urib, mana shunday sharoitlarni yaratib berishga xizmat qilib kelayapti. Barcha sharoitlarga ega yotoqxona foydalanishga topshirilishi ana shunday g‘amxo‘rlikning amaldagi namunasidir. Bundan jamoamizning quvonchi cheksiz. Albatta, bu ishchi-xodimlarimiz yashashi, bo‘sh vaqtlarda mazmunli hordiq chiqarishining mustahkam kafolatidir, - deydi Zarafshon qurilish boshqarmasi xodimi Muhsin Jo‘raqulov.

Yangi yotoqxonada ishchi-xodimlarning yashashi, dam olishi, bo‘sh vaqtlarini mazmunli o‘tkazishlari uchun barcha sharoitlar yaratildi. Eʼtirofli jihati, yotoqxona barcha qulayliklar, jumladan, yashash xonalari, yuvinish, oshxona, kir yuvish va kiyimlarni saqlash, muolaja, maʼnaviyat va maʼrifat, o‘quv xonalari hamda tibbiyot punktiga ega.

Shu bilan birga, ishchi-xodimlarning bo‘sh vaqtini mazmunli tashkil etish va sog‘lom turmush tarzini qaror toptirish maqsadida mini-futbol, basketbol, voleybol va gandbol sport turlariga mo‘ljallangan maydoncha va zamonaviy trenajyor zali mavjud.

“NKMK” AJ Matbuot xizmati