Konchilik va metallurgiya sanoatida texnologik jarayonlarni avtomatlashtirish – ishlab chiqarish barqarorligi, xavfsizligi va iqtisodiy samaradorligini taʼminlashda muhim ahamiyatga ega. Navoiy kon-metallurgiya kombinatida ham ishlab chiqarish quvvatlarini modernizatsiya qilish, raqamli texnologiyalarni keng joriy etish hamda texnologik jarayonlarga avtomatlashtirilgan boshqaruv tizimlarini joriy etishga alohida eʼtibor qaratilmoqda.

Bu borada amalga oshirilayotgan har bir loyiha ishlab chiqarishning uzluksizligi va samaradorligini oshirishga xizmat qilmoqda. Bunday muhim loyihalardan biri – “3-gidrometallurgiya zavodidagi asosiy sexlarni avtomatlashtirishni qo‘llab-quvvatlash maqsadida texnologik jarayonlarni avtomatlashtirilgan boshqarish tizimi, server uskunalari va kontroller qurilmalarini modernizatsiya qilish” loyihasi muvaffaqiyatli amalga oshirildi.

Mazkur loyiha doirasida 3-gidrometallurgiya zavodining qator sexlari va uchastkalarida keng ko‘lamli modernizatsiya ishlari bajarilib, zamonaviy server uskunalari, optik aloqa tarmoqlari, elektr taʼminoti bloklari hamda texnologik nazorat-o‘lchov asboblari o‘rnatildi. Ijro mexanizmlari yangilanib, barcha qurilmalar mavjud avtomatlashtirilgan boshqaruv tizimiga integratsiya qilindi.

Modernizatsiya jarayonida boshqaruv shkaflari rekonstruksiya qilinib, server infratuzilmasi yangilandi, sanoat aloqa tarmoqlari takomillashtirildi. Bu esa texnologik maʼlumotlarni tezkor qabul qilish, qayta ishlash va uzatish, texnologik jarayonlarni markazlashgan holda boshqarish va real vaqt rejimida monitoring qilish imkoniyatlarini yanada kengaytirdi.

Avtomatlashtirilgan boshqaruv tizimi orqali texnologik parametrlarning doimiy nazorati taʼminlanib, ehtimoliy nosozliklarni erta aniqlash hamda tezkor choralar ko‘rish imkoniyati yaratildi. Bu esa avariyaviy to‘xtashlarni kamaytirish, uskunalardan ishonchli foydalanishni taʼminlash hamda texnologik jarayonlarni boshqarish samaradorligini oshirishda muhim ahamiyatga ega.

Zavodda amalga oshirilgan mazkur modernizatsiya loyihasi Navoiy kon-metallurgiya kombinatida raqamli transformatsiya jarayonlarini izchil davom ettirish, ishlab chiqarish samaradorligini oshirish hamda zamonaviy avtomatlashtirish texnologiyalarini keng joriy etish borasidagi muhim qadamlardan biri bo‘ldi.

“NKMK” AJ Matbuot xizmati