Navoiy kon-metallurgiya kombinatida ishlab chiqarish jarayonlari bilan bog‘liq texnik yechimlarga ishchi-xodimlarni keng jalb etish, yangi g‘oya va ratsionalizatorlik takliflarni joriy etishni rag‘batlantirish, mehnat unumdorligini oshirish, resurslar va mablag‘lardan tejamkorlik bilan foydalanish evaziga iqtisodiy samaradorlikka erishish borasida qator ishlar amalga oshirilmoqda.

Korxonada ilmiy-tadqiqot va tajriba-konstruktorlik ishlarini olib borishga katta eʼtibor qaratilmoqda. Kombinat bo‘linmalarida ixtirochilik faoliyatini qo‘llab-quvvatlash va rag‘batlantirish tizimi, yoshlarning texnik ijodiyotini rivojlantirish dasturlari ishlab chiqilgan bo‘lib, har yili “Eng yaxshi ratsionalizatorlik taklifi” tanlovi 10 ta yo‘nalish bo‘yicha o‘tkazib kelinmoqda.

Xususan, kombinat ishchi-xodimlari va yosh mutaxassislari o‘rtasida o‘tkazilgan anʼanaviy “Eng yaxshi ratsionalizatorlik taklifi” tanlovi komissiyasi 281 nafar ishtirokchi tomonidan geologiya, konchilik ishi, oltin ajratib olish texnologiyasi, mexanika, energetika, transport, ishlab chiqarishni avtomatlashtirish, axborot-kommunikatsiya texnologiyalari, xavfsizlik texnikasi, atrof-muhitni muhofaza qilish kabi yo‘nalishlar bo‘yicha taqdim etilgan 257 ta ratsionalizatorlik taklifini ko‘rib chiqdi.

Jumladan, “Qizilqum” kon boshqarmasi bosh energetigi Bekzod Atabayev mazkur tanlovning energetika yo‘nalishida ikkita ratsionalzatorlik taklifini taqdim etib, faxrli 1 va 3-o‘rinlarga sazovor bo‘ldi. Uning ratsionalizatorlik takliflaridan biri “Pistali” konida karyer va drenaj suvidan 6-gidrometallurgiya zavodining texnologik ehtiyojlari uchun foydalanish” mavzusidagi ratsionalizatorlik taklifi korxonada suv resurslaridan oqilona foydalanishga xizmat qilmoqda.

- Ushbu loyihamiz bo‘yicha “Pistali” konida to‘plangan va ilgari chiqarib tashlangan drenaj suvi maxsus quvur orqali yig‘ib olinib, nasoslar orqali 10 ming kubometr sig‘imli idishlarga yetkaziladi. Keyin esa suv o‘z oqimi bilan 6-gidrometallurgiya zavodiga yo‘naltirilib, texnologik jarayonlarda foydalanilmoqda. Shuningdek, kondagi suvni samarali boshqarish maqsadida drenaj quduqlari burg‘ilanib, suv oqimi nasoslar orqali tizimli ravishda boshqarilmoqda. Barcha yig‘ilgan suv mavjud quduqlardan kelayotgan texnik suv bilan aralashtirilib, ishlab chiqarish jarayonida ishlatilmoqda, - deydi “Qizilqum” kon boshqarmasi bosh energetigi B.Atabayev.

Mazkur ratsionalizatorlik taklifi bir tomondan suv resurslaridan tejamkorlik bilan foydalanish, ikkinchi tomondan esa ishlab chiqarish jarayonlarini uzluksiz va samarali tashkil etishda muhim ahamiyatga ega.

“NKMK” AJ Matbuot xizmati