“Navoiy kon-metallurgiya kombinati” AJ Raqamli transformatsiya strategiyasi doirasida Shimoliy kon boshqarmasi tarkibidagi “Sharqiy” konida Yagona kon-geologiya axborot tizimi to‘liq ishga tushirildi.

Mazkur loyiha Fransiyaning “Dassault Systèmes” kompaniyasi bilan hamkorlikda kombinatning ishlab chiqarish jarayonlariga moslashtirilgan “GEOVIA” dasturiy yechimlarini qo‘llagan holda amalga oshirildi. Loyihani amalga oshirish davomida kombinat mutaxassislarining birgalikdagi saʼy-harakatlari natijasida katta hajmdagi ishlar bajarildi.

Xususan, “Sharqiy” konidagi ishlab chiqarish jarayonlarining o‘ziga xos xususiyatlarini hisobga olgan holda sohaning ilg‘or amaliyotlari moslashtirildi, geologiya, marksheyderlik va konchilik ishlarini rejalashtirish bo‘yicha raqamli jarayonlar bosqichma-bosqich joriy etildi, mutaxassislar dasturiy taʼminot bilan ishlash bo‘yicha o‘qitildi hamda raqamli maʼlumotlarni boshqarish va jarayonlarni standartlashtirish bo‘yicha yagona yondashuvlar ishlab chiqildi.

Taʼkidlash kerakki, Yagona kon-geologiya axborot tizimining joriy etilishi konchilik jarayonlarini rejalashtirish aniqligi va boshqarish samaradorligini oshirishga hamda ishlab chiqarish xavf-xatarlarini kamaytirishga qaratilgan.

“NKMK” AJ tomonidan ishlab chiqarish samaradorligini oshirish va korxonalarni barqaror rivojlantirishga qaratilgan raqamli tashabbuslarni rivojlantirish davom ettirilmoqda.

“NKMK” AJ Matbuot xizmati.