22-aprel kuni Qozog‘istonning Ostona shahridagi “EXPO” xalqaro ko‘rgazmalar markazida Markaziy Osiyo mamlakatlari, Mo‘g‘uliston, Ozarbayjon, Gruziya va Armaniston davlat rahbarlari va delegatsiyalari ishtirok etayotgan Mintaqaviy ekologik sammitining xalqaro ko‘rgazmasi o‘tkazilmoqda.

Xalqaro ko‘rgazmada O‘zbekiston Respublikasi milliy pavilyoni tarkibida “Navoiy kon-metallurgiya kombinati” AJ vakillari ham ishtirok etmoqda. Bu kompaniyaning zamonaviy ekologik yechimlarni joriy etish va barqaror ishlab chiqarishni rivojlantirishga qaratilgan strategik yondashuvini tasdiqlaydi. Milliy pavilyonda energiya samaradorligi, tabiiy resurslardan oqilona foydalanish bo‘yicha ilg‘or ishlanmalar namoyish etilmoqda. Kombinat mutaxassislari tomonidan konchilik va metallurgiya sanoatini modernizatsiya qilishda kompleks yondashuv, jumladan, qazib olishdan tortib xomashyoni qayta ishlashgacha bo‘lgan ishlab chiqarishning barcha bosqichlarida “yashil” texnologiyalarni joriy etish namoyish etilmoqda.

Ekspozitsiyada atmosferaga tashlamalarni kamaytirish, suv aylanishining yopiq tizimlarini joriy etish va yerlarni rekultivatsiya qilish loyihalariga alohida eʼtibor qaratilgan. Taqdim etilgan yechimlar atrof-muhitga taʼsirni minimallashtirishga qaratilgan bo‘lib, xalqaro ekologik standartlarga javob beradi. Ko‘rgazma doirasida kombinat mutaxassislari tomonidan ishlab chiqarish korxonalarida joriy etilgan yirik ekologik tashabbuslarni amalga oshirish bo‘yicha amaliy tajribalar to‘g‘risida maʼlumot berilmoqda.

“NKMK” AJ xalqaro ko‘rgazmada ishtirok etishi xorijiy hamkorlar bilan tajriba almashish, investitsiyalarni jalb qilish va yangi texnologik yechimlarni izlash uchun muhim platforma bo‘lib xizmat qiladi. Kompaniya vakillari yetakchi xalqaro tashkilotlar va texnologik kompaniyalar bilan muzokaralar o‘tkazib, barqaror rivojlanish va innovatsiyalarni joriy etish bo‘yicha hamkorlik istiqbollarini muhokama qilmoqda.

O‘zbekiston milliy pavilyoni xalqaro maydonda ekologik kun tartibini ilgari surishda mahalliy korxonalarning saʼy-harakatlarini birlashtirishning yaqqol namunasi bo‘ldi. Kombinatning ushbu tashabbusga qo‘shgan hissasi kompaniyaning ekologiya va barqaror rivojlanish sohasidagi global muammolarga javob berishga tayyorligini ko‘rsatadi.

Ko‘rgazmada taqdim etilgan loyihalar nafaqat kompaniya imijini mustahkamlaydi, balki O‘zbekiston Respublikasining ijobiy investitsiyaviy va texnologik imijini shakllantirishga xizmat qiladi.

“NKMK” AJ Matbuot xizmati