27-noyabr kuni “NKMK” AJ boshqarmasida Axborot-kommunikatsiya texnologiyalari boshqarmasi mutaxassislari tomonidan “Boston Consulting Group” kompaniyasining xalqaro ekspertlari bilan hamkorlikda sunʼiy intellekt texnologiyalarini joriy etish bo‘yicha seminar o‘tkazildi. Tadbirning asosiy maqsadi sunʼiy intellekt vositalari yordamida kompaniyaning operatsion samaradorligini oshirish yo‘llarini muhokama qilishdan iborat edi.

Seminar doirasida sunʼiy intellektni ishlab chiqarish va korporativ jarayonlarga joriy etishning ilg‘or xalqaro yondashuvlari muhokama qilindi. Ishchi-xodimlar xavfsizligi va salomatligini taʼminlash, konchilik ishlarini optimallashtirish, tog‘ jinslarini tashishni boshqarish, qayta ishlash texnologik jarayonlari (flotatsiya, maydalash, sorbsiya)ni takomillashtirishda mehnat unumdorligini oshirish uchun AI-texnologiyalarining imkoniyatlariga alohida eʼtibor qaratildi.

Shuningdek, seminar davomida real vaqt tartibida sunʼiy intellektni umumkorporativ funksiyalarda qo‘llanilishi bo‘yicha misollar namoyish etildi. Bular qatoriga taqdimot materiallarini tayyorlash, ofis hujjatlarini yuritish, aqlli yordamchidan foydalanish, kundalik vazifalar (RPA)ni, shu jumladan xarid jarayonlari, moliyaviy hisobotlar, byudjetlashtirish va boshqa jarayonlarni avtomatlashtirish kiradi.

Tadbirda AKTB boshlig‘i B.Davlatov taʼkidlaganidek:

“Bugungi kunda “NKMK” AJ sohaning yetakchi korxonasi sifatida 2030-yilgacha mo‘ljallangan raqamli strategiyasini amalga oshirmoqda. Ushbu strategiya maqsadlariga erishish uchun korxona hozirdan raqamli texnologiyalar va sunʼiy intellektni joriy etgan holda bir qator yechimlarni qo‘llamoqda. Jumladan, ilg‘or xalqaro tajribaga asoslanib, sunʼiy intellekt tizimlarini joriy etish orqali optimallashtirilishi mumkin bo‘lgan asosiy ishlab chiqarish va yordamchi jarayonlarni aniqlash ko‘zda tutilgan. Sunʼiy intellektdan foydalanish bugungi kunda kompaniyaning yanada barqaror rivojlanishini taʼminlash uchun strategik yo‘nalish hisoblanadi.”

Seminar ishtirokchilari kombinat va konchilik sohasidagi yetakchi kompaniyalarning muvaffaqiyatli tajribasidan foydalangan holda o‘zaro fikr-mulohazalarni bildirishdi.

“NKMK” AJ Matbuot xizmati.