Navoiy kon-metallurgiya kombinatida metrologik ta’minot tizimiga alohida strategik ahamiyat qaratilib, sohada zamonaviy yondashuvlar asosida keng ko‘lamli ishlar amalga oshirilmoqda. Ayniqsa, ishlab chiqarish jarayonlarida o‘lchashlar aniqligi va ishonchliligini ta’minlash maqsadida, NKMK tizimida faoliyat yuritayotgan akkreditatsiyadan o‘tgan beshta metrologik xizmatlar qiyoslash laboratoriyalari muhim ahamiyatga ega.

Mazkur laboratoriyalar xalqaro va milliy standartlar talablari asosida faoliyat yuritib, barcha ishlab chiqarish obyektlarida qo‘llanilayotgan o‘lchash vositalarining qiyoslash va metrologik nazorat ishlarini amalga oshirib kelmoqda. Ushbu laboratoriyalarda bosim, harorat, massa, elektr kattaliklari, sarf-o‘lchash vositalari hamda texnologik jarayonlarda qo‘llaniladigan yuqori aniqlikdagi nazorat o‘lchash vositalarining metrologik xizmatlari tashkil etilgan.

Bugungi kunda ushbu metrologik xizmatlarning qiyoslash laboratoriyalari tomonidan minglab o‘lchash vositalari belgilangan tartibda qiyoslashdan o‘tkazilib, ularning texnik holati, aniqligi va xalqaro talablarga muvofiqligi ta’minlanmoqda. Bu esa, ishlab chiqarish jarayonlarining uzluksiz va barqaror ishlashini ta’minlash, texnologik xatoliklarning oldini olish hamda mahsulot sifati kafolatini mustahkamlashda muhim ahamiyat kasb etmoqda.

Joriy yilda qiyoslash laboratoriyalaridan uchtasining qayta muvofiqligi “O‘zbekiston akkreditatsiya markazi” DM tomonidan ijobiy baholandi. Jumladan, Shimoliy kon boshqarmasi, Janubiy kon boshqarmasi va Navoiy mashinasozlik zavodining akkreditatsiya guvohnomalari ijobiy takroriy akkreditatsiyadan o‘tkazildi.

Qiyoslash laboratoriyalarda zamonaviy raqamli uskunalar va avtomatlashtirilgan o‘lchash tizimlaridan samarali foydalanilayotganligi natijasida qiyoslash jarayonlarining tezkorligi va ishonchlilik darajasi yanada oshmoqda. Laboratoriyalar dunyodagi yetakchi brendlarga mansub yuqori aniqlikdagi o‘lchash vositalari va etalon uskunalar bilan to‘liq ta’minlangan.

NKMKdagi metrologik xizmatlar sohasida faoliyat yuritayotgan mutaxassislar va laboratoriya xodimlarining bilim va malakasini oshirishga ham alohida e’tibor qaratilgan. Ular muntazam ravishda zamonaviy o‘quv dasturlari, malaka oshirish kurslari va amaliyotlarda ishtirok etib, o‘z kasbiy saviyasini oshirib bormoqda.

Aniq o‘lchashlar va ishonchli nazorat tizimi har qanday yirik ishlab chiqarish majmuasining samaradorligi, xavfsizligi va texnologik barqarorligini ta’minlovchi muhim omil hisoblanadi. Ayniqsa, kon-metallurgiya sohasida geologik qidiruvdan tortib, ma’dan qazib olish, qayta ishlash va tayyor mahsulot ishlab chiqarishgacha bo‘lgan barcha jarayonlar yuqori aniqlikdagi o‘lchashlarga tayanadi.

Kombinat faoliyatiga joriy etilayotgan zamonaviy texnologiyalar, raqamlashtirilgan boshqaruv tizimlari va xalqaro standartlarga mos ishlab chiqarish jarayonlari aniq va ishonchli metrologik ta’minot bilan bog‘liqdir.

Kombinatda metrologik xizmatni rivojlantirish, zamonaviy laboratoriyalar va avtomatlashtirilgan nazorat tizimlarini joriy etish orqali texnologik jarayonlarning barqarorligi ta’minlanmoqda. Bu esa, energiya va resurs sarfini kamaytirish, ekologik xavfsizlikni kuchaytirish hamda inson omili ta’sirini minimallashtirishga xizmat qilmoqda.

“NKMK” AJ Matbuot xizmati