Navoiy kon-metallurgiya kombinatining gidrometallurgiya zavodlarida tarkibida qimmatbaho metallar bo‘lgan maʼdanni qayta ishlash bilan bog‘liq texnologik jarayonlar bevosita suv yordamida amalga oshiriladi. Korxonalarni texnik suv bilan taʼminlashda undan samarali foydalanish va tejash muhim ahamiyatga ega.

Xususan, 3-gidrometallurgiya zavodining ishlab chiqarish quvvatlari kengayishi natijasida suvga bo‘lgan ehtiyoj yanada ortishi tufayli korxonaga texnik suv yetkazib berish dolzarb masala bo‘ldi. Ushbu masalani yechish uchun 2016-yilda Uchquduq tumani hududida joylashgan Beshbuloq suv havzasida “Beshbuloq” nasos stansiyasi qurilib, 3-GMZ bilan bog‘lovchi qariyb 20 km uzunlikdagi sho‘r suvga chidamli (kompozit shishaplastik) suv quvuri yotqizildi. Bugungi kunda ushbu nasos stansiyasi orqali Shimoliy kon boshqarmasi bo‘linmalariga yiliga o‘rtacha 6 mln. kubmetr texnik suv yetkazib berilmoqda. Ushbu ko‘rsatkich 2025-yilda 8 mln. kubmetrgacha oshirilishi kutilmoqda.

Kon boshqarmasining Issiqlik, suv-gaz taʼminoti va oqova suvlar sexining Tuzsizlantirish majmuasi 3-gidrometallurgiya zavodi hududida joylashgan bo‘lib, BIOX sexini tuzsizlantirilgan texnik suvi bilan taʼminlamoqda. Germaniyaning “Eurowater” kompaniyasi tomonidan 2016-yilda qurilgan majmua “Beshbuloq” nasos stansiyasidan keladigan texnik suvni maxsus filtrlar yordamida tuzsizlantirib bermoqda.

Shimoliy kon boshqarmasi bosh energetik bo‘limi yetakchi muhandisi Jamol Mustafayev taʼkidlaganidek:

“Beshbuloq suv havzasidan Tuzsizlantirish majmuasiga keladigan suv 200 metr chuqurlikdagi yuqori minerallashgan yer osti suvidir. Bu suvni tuzsizlantirish Amudaryo daryosidan “Amudaryo-Zarafshon” suv quvuri orqali olinadigan suv sarfini tejash imkonini bermoqda. Ushbu majmua yiliga o‘rtacha 2,6 mln. kubmetrdan ortiq tuzsizlantirilgan texnik suv ishlab chiqarmoqda. Mavjud gidrogeologik xulosalarga ko‘ra bu yer osti sho‘r suvi 25 yillik zahiraga ega.”

“NKMK” AJ Matbuot xizmati.