Navoiy davlat konchilik va texnologiyalar universitetida ommaviy axborot vositalari vakillari va jurnalistlar uchun “Zarafshon mintaqasini kompleks innovatsion rivojlantirish: yutuqlar, muammolar va istiqbollar” mavzusidagi VII xalqaro ilmiy-texnik anjumani natijalari” mavzusida matbuot anjumani bo‘lib o‘tdi.

Matbuot anjumanida “NKMK” AJ Innovatsion rivojlantirish bo‘yicha direktor L.Ataqulov, Markaziy ilmiy-tadqiqot laboratoriyasi boshlig‘i M.Qurbonov, NDKTU ilmiy ishlar va innovatsiyalar bo‘yicha prorektori T.Nurmurodov, OAV vakillari va jurnalistlar ishtirok etishdi.

Tadbirda taʼkidlaganidek, mazkur xalqaro anjuman Zarafshon mintaqasini barqaror va kompleks rivojlantirish, zamonaviy ilm-fan yutuqlarini ishlab chiqarishga keng joriy etish, innovatsion texnologiyalardan samarali foydalanish, shuningdek, ilm-fan, taʼlim va sanoat o‘rtasidagi hamkorlikni yanada mustahkamlash nuqtai nazaridan muhim muloqot maydoni bo‘ldi.

Anjuman doirasida mahalliy va xorijiy olimlar, mutaxassislar, ishlab chiqarish korxonalari vakillari, oliy taʼlim va ilmiy-tadqiqot muassasalari xodimlari ishtirokida mintaqani innovatsion rivojlantirishning eng dolzarb masalalari muhokama qilindi. Xususan, sanoat korxonalarini texnologik modernizatsiya qilish, raqamli texnologiyalar va sunʼiy intellekt yechimlarini joriy etish, geologiya va konchilik sohasida zamonaviy texnologiyalardan foydalanish, energiya va resurslar samaradorligini oshirish, atrof-muhitni muhofaza qilish, suv resurslaridan oqilona foydalanish kabi masalalarga alohida eʼtibor qaratildi.

Matbuot anjumanida OAV vakillari va jurnalistlarning savollariga atroflicha javoblar berildi.

"NKMK" AJ Matbuot xizmati