Navoiy kon-metallurgiya kombinatida qimmatbaho metallar ishlab chiqarish hajmini oshirishda “Muruntov” konini o‘zlashtirish bo‘yicha amalga oshirilayotgan investitsion loyiha muhim ahamiyatga ega. Konning chuqurlashishi natijasida qazib olinayotgan tog‘ jinslarini avtoag‘dargichlarda tashishga sarflanayotgan vaqt, yo‘l masofasi va yoqilg‘i-moylash materiallari xarajatlarini qisqartirish uchun konveyer liniyalaridan keng foydalanib kelinmoqda.

Keyingi yillarda kombinatda ish unumdorligi yuqori bo‘lgan bunday konveyer liniyalarini qurish va kengaytirishga alohida eʼtibor qaratilmoqda. Bugungi kunda “Muruntov” konini o‘zlashtirishning V navbati II bosqichi investitsiya loyihasini amalga oshirish doirasida konda qazib olish va tashish jarayonlarini optimallashtirish maqsadida, umumiy uzunligi 7,7 kilometr bo‘lgan 5 va 6-konveyer liniyalarini qurish ishlari olib borilmoqda.

Mazkur konveyer liniyalari to‘liq quvvatda ishga tushirilgandan so‘ng konda tog‘ jinslarini avtoag‘dargichlarda tashish masofasini qisqartirish, dizel yoqilg‘isi sarfi hamda atrof-muhit va atmosferaga chang-gaz tarqalishini kamaytirish imkonini beradi.

Ushbu konveyer liniyalari uchun kerakli asbob-uskunalar kombinatning Navoiy mashinasozlik zavodi va Zarafshon taʼmirlash-mexanika zavodida to‘liq mahalliylashtirilgan holda tayyorlanmoqda. Qurilish-montaj ishlari Zarafshon qurilish boshqarmasi tomonidan olib borilmoqda.

“NKMK” AJ Matbuot xizmati