“Navoiy kon-metallurgiya kombinati” AJda amalga oshirilayotgan Raqamli transformatsiya strategiyasi hamda konlar va gidrometallurgiya zavodlarining operatsion samaradorligini oshirish dasturi doirasida Shimoliy kon boshqarmasidagi “Sharqiy” konida Yagona kon-geologiya axborot tizimini joriy etish loyihasiga start berildi.

Loyihadan ko‘zlangan maqsad – geologik, marksheyderlik va kon-texnik maʼlumotlar bilan samarali ishlash uchun zamonaviy raqamli vositalarni joriy etishdan iboratdir. Mazkur loyiha dunyoning raqamli muhandislik modellashtirish sohasidagi yetakchilari tomonidan ishlab chiqilgan “GEOVIA Surpac” va “GEOVIA MineSched” dasturiy taʼminotlari asosida amalga oshirilmoqda.

Shu bilan birga, loyiha bo‘yicha maxsus avtomatlashtirilgan ish o‘rinlarini yaratish hamda NKMK mutaxassislarini “GEOVIA” dasturiy taʼminoti bilan ishlashga o‘rgatish ko‘zda tutilgan. Yaqinda birinchi o‘quv mashg‘ulot o‘tkazildi. Unda Shimoliy kon boshqarmasi mutaxassislari “GEOVIA Surpac” dasturining asosiy vazifalarini o‘zlashtirib, geologik modellashtirish va konchilik ishlarini rejalashtirish uchun raqamli imkoniyatlar bilan tanishdilar.

Mazkur axborot tiziminini joriy etish NKMK raqamli transformatsiyasining muhim bosqichi bo‘lib, konchilik jarayonlarini rejalashtirish aniqligi va boshqarish samaradorligini oshirishga hamda ishlab chiqarish xatarlarini kamaytirishga qaratilgan.

“NKMK” AJ Matbuot xizmati