Zarafshon taʼmirlash-mexanika zavodida ishlab chiqarilayotgan mahalliylashtirilgan, import o‘rnini bosuvchi mahsulotlarga bo‘lgan talab yildan-yilga ortib bormoqda. Mazkur zavod Navoiy kon-metallurgiya kombinati bo‘linmalari uchun zarur jihozlar va moslamalarni o‘z vaqtida, sifatli taʼmirlash va tayyorlab berishga xizmat qilmoqda.

Bugungi kunda korxonaning sex va uchastkalarida zamonaviy dastgohlar, texnologik uskuna va qurilmalardan foydalanilib, ular yordamida turli o‘lchamli metall detallarga ishlov berish imkoniyati mavjud. Zavod jamoasi tomonidan mexanika-yig‘uv, temirchilik-presslash, payvandlash, jihozlarni taʼmirlash, metall konstruksiyalar, ehtiyot qismlar ishlab chiqarish, montaj qilish kabi o‘ndan ortiq yo‘nalishlarda xizmatlar ko‘rsatilmoqda.

Korxona faoliyatida mahalliylashtirish muhim ahamiyatga ega. Mahalliylashtirish dasturi doirasida samarali natijalarga erishmoqda. Jumladan, zavodda gidravlik ekskavatorlar va burg‘ilash uskunalari uchun turli ehtiyot qismlar, konveyerlar uchun roliklar, texnologik uskunalarning ehtiyot qismlari ishlab chiqarilib, gidrometallurgiya zavodlarida foydalanilayotgan nasoslar, texnologik uskunalar, ekskavatorlarning kovshlari va elektr dvigatellar taʼmirlanmoqda.

2025-yilda korxona tomonidan 271 mlrd. so‘mlik mahsulot ishlab chiqarilgan bo‘lsa, joriy yilda bu ko‘rsatkichni 320 mlrd. so‘mga yetkazish rejalashtirilgan. 2030-yilgacha zavod quvvatlarini kengaytirish ustida ish olib borilmoqda. Ushbu vaqt davomida zavodda ishlab chiqarilayotgan mahsulot turlarini oshirish, yangi sexlar tashkil etish, yangi ish o‘rinlari yaratish, zamonaviy uskuna va jihozlar keltirish maqsad qilingan.

Hozirgi vaqtda zavodda metallga lazer orqali ishlov berish dastgohlarini ishga tushirish, korxona hududida olib boriladigan gaz-olovli ishlar uchun kislorodni quvurlar orqali yetkazib berish, zavodning Xorazm viloyati Tuproqqalʼa tumanidagi “Sarimoy maydoni” taʼmirlash-mexanika uchastkasini kengaytirish bo‘yicha loyiha hujjatlari ustida ish olib borilmoqda.

“NKMK” AJ Matbuot xizmati