Navoiy kon-metallurgiya kombinatida ishlab chiqarish jarayonlarini doimiy takomillashtirish, kompaniyaning umumiy maqsadlariga erishish uchun xodimlarning shaxsiy masʼuliyatini oshirish va ularning samarali hamkorligini rivojlantirishga ko‘maklashadigan “Kaizen” va “Lean” usullarini joriy etish bo‘yicha tizimli ishlar olib borilmoqda.

Mazkur usullarni qo‘llash ishlab chiqarish va boshqaruv jarayonlari samaradorligini oshirish, resurslardan oqilona foydalanish, ishlab chiqarish xavfsizligi darajasi va bajariladigan ishlar sifatini oshirishga qaratilgan.

Bu yo‘nalishdagi ishlarni amalga oshirish doirasida kombinatda “Kaizen” va “Lean” usullarini amalda qo‘llashga bag‘ishlangan qator o‘quv dasturlari o‘tkazilmoqda. Ushbu dasturlar bo‘yicha dastlabki treninglar “NKMK” AJ boshqarmasi, Markaziy, Shimoliy, Janubiy kon boshqarmalari, “Qizilqum” kon boshqarmasi, Navoiy mashinasozlik zavodining rahbar xodimlari va mutaxassislari ishtirokida bo‘lib o‘tdi.

Xodimlarni o‘qitish va ishlab chiqarish jarayonlarini doimiy takomillashtirish bo‘yicha tashabbuslarni amalga oshirish kombinatda tasdiqlangan chora-tadbirlar rejasiga muvofiq bajarilmoqda. Treninglar tashkiliy rivojlanish bo‘limi bosh mutaxassisi, “Kaizen” bo‘yicha sertifikatga ega murabbiy Marat Mirzajanov tomonidan olib borilib, ishtirokchilar tejamkor ishlab chiqarishning asosiy tamoyillari va ularni kundalik ishlab chiqarish faoliyatida qo‘llashning amaliy vositalari bilan tanishtirilmoqda.

Treninglardan keyingi bosqich sinov loyihalarini muhokama qilish va saralash hamda ushbu usullarni kombinatning ishlab chiqarish jarayonlariga izchil joriy etishdan iboratdir.

“NKMK” AJ Matbuot xizmati