23-sentabr kuni Navoiy kon-metallurgiya kombinati ishchi-xodimlari uchun O‘zbekiston Respublikasi Prezidenti Shavkat Mirziyoyevning mamlakatimiz mustaqilligining 35 yilligiga bag‘ishlangan tantanali marosimdagi nutqining mazmun-mohiyatini yetkazish, unda ilgari surilgan ezgu g‘oya va tashabbuslarni targ‘ib etishga bag‘ishlangan o‘quv-seminar o‘tkazildi.

“NKMK” AJ boshqarmasida videokonferensaloqa orqali bo‘lib o‘tgan seminarda Respublika Maʼnaviyat va maʼrifat markazi masʼul xodimi, tarix fanlari doktori Farhod Ochilov, kombinat boshqarmasi rahbar-xodimlari, kasaba uyushmasi Kengashi vakillari va bo‘linmalar ishchi-xodimlari ishtirok etishdi.

Tadbirda Respublika Maʼnaviyat va maʼrifat markazi masʼul xodimi F.Ochilov tomonidan “Uch ming yillik ildizdan inson qadrigacha: tarixiy vorislik, milliy o‘zlik va 35 yillik islohotlarning o‘lchovi”, “Milliy yuksalish o‘n yilligi: yetti milliy dastur yaxlit tizim sifatida” kabi mavzularda ma’ruzalar qilindi.

Seminarda Prezidentimiz nutqida ilgari surilgan ezgu g‘oyalar va muhim tashabbuslarning mazmun-mohiyati, ularning jamiyat hayotidagi ahamiyati, yosh avlodni vatanparvarlik ruhida tarbiyalash, milliy qadriyatlar va ma’naviy merosni asrab-avaylash masalalariga alohida e’tibor qaratildi.

“NKMK” AJ Matbuot xizmati