24-sentabr kuni Navoiy kon-metallurgiya kombinatida Mahalliylashtirish dasturi doirasida mahalliylashtirilgan va import o‘rnini bosuvchi mahsulotlar ishlab chiqarish bo‘yicha olib borilayotgan ishlar bilan tanishish maqsadida, ommaviy axborot vositalari vakillari va jurnalistlar uchun Navoiy mashinasozlik zavodiga press-tur tashkil etildi.

Press-tur davomida OAV vakillari va jurnalistlar zavoddagi Navoiy davlat konchilik va texnologiyalar universiteti bilan hamkorlikda tashkil etilgan Ishlab chiqarishni mahalliylashtirish va innovatsion rivojlantirish markazi, yirik sexlarda bo‘lib, korxonada ish jarayonlari va ishlab chiqarish quvvatlarini oshirish bo‘yicha olib borilayotgan amaliy ishlar bilan yaqindan tanishib, ishchi-xodimlar bilan suhbatlashdilar.

Navoiy mashinasozlik zavodi Navoiy kon-metallurgiya kombinatining yirik bo‘linmalaridan biri bo‘lib, mahalliylashtirilgan va import o‘rnini bosuvchi mahsulotlar ishlab chiqarish bo‘yicha respublikada yetakchi korxona hisoblanadi. Bugungi kunda korxonada 3,5 ming nafardan ortiq muhandis-texnologlar, metallurglar, mexaniklar, konstruktorlar va boshqa kasb egalari fidokorona mehnat qilishmoqda.

So‘nggi yillarda kombinat gidrometallurgiya zavodlari uchun zamonaviy sharli tegirmonlar, gidrosiklon va konveyyer qurilmalari, nasoslar, quyiltirgichlar, nostandart uskunalar, metallkonstruksiyalar va boshqa turdagi mahsulotlar bevosita Navoiy mashinasozlik zavodida ishlab chiqarilmoqda. Mahalliylashtirish dasturi doirasida zavodda 2025-yilda 103 ta loyiha bo‘yicha 1,1 trln so‘mdan ortiq mahalliylashtirilgan mahsulotlar ishlab chiqarilgan bo‘lsa, 2026-yilda esa 123 ta loyiha bo‘yicha 1,8 trln so‘mdan ortiq mahsulot ishlab chiqarish rejalashtirilgan.

Keyingi yillarda zavodda Mahalliylashtirish dasturi asosida yangi turdagi mahsulotlarni ishlab chiqarish bo‘yicha keng ko‘lamli ishlar amalga oshirildi. Mexanika-yig‘uv sexini texnik va texnologik qayta jihozlash natijasida og‘irligi 980 tonnagacha bo‘lgan tegirmonlar, yanchish uskunalari, nasoslar, quyultirgichlar ishlab chiqarish va ularni ta’mirlash, og‘irligi 400 tonnagacha bo‘lgan yirik o‘lchamdagi jihozlarga ishlov berish imkoni yaratildi. Quymachilik sexida o‘rnatilgan 25 tonnalik zamonaviy pech metall eritish quvvatini 30 ming tonnadan 35 ming tonnagacha oshirdi. Gidravlika uskunalari ishlab chiqarish uchastkasida poliuretan mahsulotlarini quyish uchun yangi qurilma o‘rnatildi.

Yangi ishlab chiqarish obyektlarining foydalanishga topshirilayotganligi bilan bog‘liq holda kombinat bo‘linmalarining metall konstruksiyalar, jihozlar va ehtiyot qismlarga bo‘lgan ehtiyojlari kundan-kunga ortib boryapti. Ana shuni hisobga olib, zavod Mexanika-yig‘uv sexining yirik hajmli dastgohlarga ishlov berish uchastkasi kengaytirilmoqda. Zamonaviy dastgohlar o‘rnatiladigan uchastkani joriy yil yakuniga qadar ishga tushirish mo‘ljallangan.

Joriy yilda zavodning stanoksozlik sexiga Germaniyaning mashinasozlik sohasidagi yetakchi “Kapp Niles” kompaniyasida ishlab chiqarilgan “ZP-24” rusumli dastgoh keltirildi. Ushbu zamonaviy dastgoh diametr o‘lchovi 2,4 ming millimetrgacha bo‘lgan tishli g‘ildiraklarni silliqlash, og‘irligi 20 tonnagacha bo‘lgan yirik detallarga yuqori darajada ishlov berishga mo‘ljallangan. Endilikda zavodda konveyer reduktorlari, kon, shaxta, karyer mashinalarining tishli g‘ildiraklari va vallariga yanada aniqlik bilan mexanik ishlov berish imkoni mavjud. Natijada mahsulotlarning ishlash muddati uzayib, ulardan foydalanish jarayonida shovqin darajasi pasayishiga erishilyapti.

Korxona jamoasining sa’y-harakatlari, mavjud imkoniyatlardan to‘g‘ri va oqilona foydalanish evaziga bundan buyon ham mahsulot ishlab chiqarishda o‘sish sur’atiga erishiladi.

“NKMK” AJ Matbuot xizmati