“Navoiy kon-metallurgiya kombinati” AJ axborot xavfsizligini boshqarish tizimining “O‘zMSt ISO/IEC 27001:2023” standarti talablariga muvofiqligini tasdiqlash bo‘yicha ishlarining birinchi bosqichini muvaffaqiyatli yakunladi. “O‘zMSt ISO/IEC 27001:2023 – Axborot texnologiyasi. Xavfsizlikni ta’minlash usullari. Axborot xavfsizligini boshqarish tizimlari” standarti xalqaro ISO standartiga asoslanganligi sababli, xalqaro darajada tan olinadi. Baholash ishlari “Kiberxavfsizlik markazi” DUK hamda “NKMK” AJ Axborot-kommunikatsiya texnologiyalari boshqarmasi va Axborot xavfsizligi bo‘limi mutaxassislari ishtirokida o‘tkazildi.

Birinchi bosqich doirasida tizimning tayyorgarlik darajasi kompleks tarzda baholandi: axborot xavfsizligini boshqarishga oid asosiy hujjatlar va tartib-taomillar, xavflarni boshqarish yondashuvlari, rollar va vakolatlarning taqsimlanishi, siyosatlar va reglamentlarning dolzarbligi, shuningdek talablarni bajarishni nazorat qilish amaliyoti ko‘rib chiqildi. Foydalanishni boshqarish, hodisalarga javob berish, axborotni himoya qilish va tashkiliy xavfsizlik choralariga alohida e’tibor qaratildi.

Birinchi bosqich natijalariga ko‘ra, hech qanday e’tiroz va kamchiliklar aniqlanmadi. Bu esa tashkil etilgan jarayonlar to‘g‘ri shakllantirilganini va keyingi bosqich – amaliyotda tizimning qanday ishlayotganini yakuniy baholashga to‘liq tayyorgarlikni tasdiqlaydi. Hozirgi paytda “NKMK” AJ ikkinchi, hal qiluvchi bosqichga – axborot xavfsizligini boshqarish tizimining amaliyotdagi faoliyatini atroflicha baholash jarayoniga o‘tmoqda.

“O‘zMSt ISO/IEC 27001:2023” standarti bo‘yicha sertifikatga ega bo‘lish kombinat axborot infratuzilmasining kiberxavfsizlik yetukligini oshirish, raqamli xizmatlar barqarorligini mustahkamlash va ishlab chiqarish hamda korporativ axborot tizimlaridagi xavflarni kamaytirishda muhim qadam hisoblanadi. Mazkur sertifikatning olinishi tashkilotning mijozlar, hamkorlar, investorlar, aksiyador, auditorlar va Respublikamiz yuqori turuvchi organlari oldidagi ishonchliligini oshiruvchi muhim ko‘rsatkichdir.

Baxodir DAVLATOV,

“NKMK” AJning axborot texnologiyalari va

raqamlashtirish bo‘yicha direktori.